Nelson Oduber: Un lider mediocre ta busca pa saca probecho den situacion di COVID

1943

Con largo bo por bay pa haci politica barata? Mundo henter ta den gara di un maldita pandemia COVID-19 y lamentablemente nos tampoco a scapa. Paisnan rico y desaroya mes ta den problema cu e fenomeno maligno aki. El a destrui economia, finansas, comercio, trahadonan y a laga hopi hende sin trabou, sin entrada y sin cu tin perspectiva por lo pronto. Mucho experto riba tereno medico enbes di yuda ta bringa otro.

Falta di madurez politico

Na Aruba gobierno ta haciendo su esfuerso pa un recuperacion economico pa purba crea un perspectiva y hasta pa esey tin elemento infeliz ta critica. Hasta tin politico mediocre kier culpa gobierno pa e virus y ta purba saca probecho politico na un forma comosifuera cu ta e gobernantenan tin e “patent” pa scoge ken ta haya COVID-19. Un mentalidad infantil, falta di madurez politico, mucho amateur y falta di profundidad den conocemento cu e cos aki a bin pa keda pa basta tempo, segun varios experto di renombre! Na Hulanda KLM so a kita 6.000 empleado y Lufthansa, compania di e pais mas rico na mundo, ta perde 500 miyon Euro pa ora y a kita miles di trahado! Rond mundo gobiernonan ta man na cabes, pasobra ta pio so cos ta birando tanten cu abo tambe no ta yuda cu bo disciplina mester keda cuida curpa!

Un loco hungando politica barata

Na Aruba un lider loco a dicidi cu e si sa con ta “hunga” politica barata y ta bay contra tur regla cu su pandiya door di bishita hospital cu aprobacion di e director mes cu no a yama siguridad pa saca esunnan di AVP for di e edificio y pa falta di duna respet p’e reglanan cu hospital mes a pone pa tur hende, menos lider di AVP! Culpa gobierno pa e virus enbes di bin para banda di gobierno y sostene e medidanan pa yuda y yuda pa eherce e disciplina. Con bo por tin un moralidad cochino pa hunga politica cu hasta salud di hende comosifuera ta e gobierno ta dicidi ken ta haya e Coronavirus y no abo cu pa mala suerte a pega cu ne pa cualkier descuido ta bisa mas di ken abo ta cu di otronan cu kier coopera? Politiconan asina bo ta haya 13 di nan den un caha di webo di un dozijn. Pueblo mester condena e cosnan aki.

Practica Solidarismo

Ora bo tende tambe e ‘lider’ sindical ta yora pa entrega 5%, mientras den turismo tin comerciante, trahado y gobierno ta ricibi 40% menos y miles di trahado hasta nada nada na entrada, pero tin cu cria nan yiunan, mester manda nan scol y nan mester paga nan utilidad y percura pa pan ariba mesa no ta nada muestra di ta un ser humano cu tin cu practica solidarismo. Ta e actitudnan aki tin paisnan banda di nos y hopi pais na mundo na werki tanten cu abo como pueblo ta sigui tolera elementonan infeliz asina y degrada den moralidad y sigui haci politica cu hasta nos salud pa purba gana bo voto pa otro aventura desastroso di un otro mega debe. Un contribucion pa purba spierta bo na ora y adverti bo pa e lobonan den cuero di carne, manera mi amigo ta bisa “Ma Taha!”