Riba di dos dia di Pasco (26 di december), pa hopi ta un dia dia fiesta den famia. Pa Natasha Janga e dia a bay diferente y tristo. Despues di dos dia sin come y cu tur cos pafo di cas, a haya un solucion p’e hopi lihe. Ta despues cu 24ora.com a tene un entrevista cu ne, a ricibi hopi yamada y reaccion. Hopi ta esunnan cu a trece cuminda, placa y te hasta un ciudadano a ofrece un dak pa e drumi.
Polis di bario di Playa, Elite y 24ora.com a yuda carga tur caha y articulonan di e señora y hinca den truck cu Elite Production a facilita. Den un caravana a core for di Sero Blanco pa Ponton, unda a baha tur e pertecencianan di e señora.
Awe Natasha Janga ta drumi bou di un dak en bes di riba caya, cual tabata e situacion prome cu e entrevista. Ta di aplaudi e forma con e cooperacion entre polis, prensa y demas instancianan, cu na final tabatin un solo meta.
Problemanan social ta asotando nos isla y aunke gobierno a papia di Crisisplan Social, pa un motibo of otro e fondonan aki no ta yega na e pobernan. Tin mas adicto drumi riba caya, mas hende ta perde cas, perde trabou, muchanan cu hamber, casonan di violencia domesticp combina cu abuso sexual den cas a crece den e pandemia.
Pero instancianan ta keto y ta cu vakantie di Pasco. Danki Dios cu pueblo por conta cu medionan manera 24ora.com cu ta traha 24 ora pa dia, Pasco y Aña Nobo pa informa pero tambe pa ilumina e berdadnan den comunidad cu gobierno ta purba pa tene den scuridad.
Pa nos di 24ora.com…esaki ta nos trabou primordial. For di mas of menos tres aña pasa caba nos a adapta nos maneho y ta dedica mas atencion na problemanan social, pa yuda esunnan cu no tin un bos. Aunke cu de bes en cuando ta topa cu un cu ta probecha di e situacion, mayoria caso ta di hendenan cu a purba tur cos, a bati na tur porta, a acerca ministernan, parlamentarionan y tur a duna nan lomba. A keda nan un solo recurso, cu den e caso aki ta 24ora.com cu pa hopi aña ta yenando e rol di “ombudsman” na Aruba pa motibo cu nos isla no tin!
Nos ta sali pa e homber chikito, expone su problema, surpasa tur berguensa, den su afan pa haya ayudo. Mescos cu mayoria caso, awe e señora aki a haya no un, sino varios man di nos mas di 120 mil usuarionan cu a activa mesora. Pa nos, ta yena nos di masha orguyo di a cumpli cu nos rol, a yuda un persona cu nos no ni conoce, pero cu lo drumi riba un cama awe nochi bou un dak, en bes di riba caya unda cu ta.
Danki Aruba!
