Nashonan Uni ta pasa resolushon historiko pa Inglatera duna islanan Chagos bek na su pueblo

James Finies , Nos Ke Boneiru Bek ku esaki ke re-asegura I duna speranza na e pueblo di Bonaire basa riba e akshon historiko resien den Nashonan Uni den su di 73 seshon di 22 mei 2019 adoptando un resolushon , demandando Inglatera pa retira inkondishonalmente su atministrashon kolonial for di e islanan Chagos situa den Oceano Indio I duna bek e islanan mas rapido posibel bek na e pueblo di e islanan.

Nos di NKBB ta di opinion ku esaki ta un viktoria pa nos pueblo Boneriano tambe. Desde e separashon di e islanan Chagos for Mauritius den anjanan 70, e pueblo di e islanan a kuminsa un lucha kontinou pa hanja nan islnan bek.

Na februari 2019 e Korte Internashonal di Hustisia a duna un opinion riba e disputa ku “e separashon no tabata basa riba un ekspreshon genuina, legitimo I liber I boluntad di e pueblo konserni” manera ta deskribi den resolushon 1514(XV) di Nashonan Uni. I sin e pueblo ta di akuerdo esaki ta violashon di ley internashonal. Debi ku e proseso di deskolonisashon di e islanan no a wordu kondusi di un manera konsistente ku e derecho di outodeterminashon I no a wordu legalmente kompleta di akuerdo ku ley internashonal, e kontinuashon di atministrashon dor di Inglatera ta hasi esaki un akto illegal. Ta mesun situashon manera den e kaso di islanan Chagos kontra Inglatera a surgi riba nos islanan di Bonaire I Sint Eustatius despues di disolushon illegal di Antia Hulandes riba 10 oktober 2010.

Bao di menasa di  gobierno Hulandes, sekretario di estado Sra Bijleveld, nos islanan a wordu aneksa I integra dor di ankra nos pueblonan bao di derechonan desigual den konstitushon Hulandes. Esaki apesar di varios referenduman riba nos islanan na 2004, 2005, 2010, 2014 I 2015 ku no a legitimisa I a rechaza e status aktual ku ta kontinuashon di atministrashon kolonial Hulandes, kaminda e deseo di nos pueblonan no ta wordu respeta, I te ku awe a kontinua ta goberna nos den un status ku nos no a skohe pe. Ku esaki nos ke pone atenshon spesial na e hipokresia di gobierno Hulandes ku a hasi deklarashon por eskrito na Korte Internashonal di Hustisia riba 28 februari 2019 ultimo riba e pregunta di e konsekuensianan legal bao di ley internashonal, inkluyendo obligashonan ku ta wordu refleha den resolushonan 1514(XV), 2066 (XX), 2232 (XXI), 2357 (XXII) di Asamblea General di Nashonan Uni. Ironia ta ku gobierno Hulandes ta deklara ku a base di e formulashonan aki, ku e desishonan riba e status politiko I e desaroyo ekonomiko, sosial I kultural mester wordu tuma pa e pueblo mes. I ku e  desishonan aki mester wordu hasi den pleno libertat, sin interferensia o preshon aheno.

Hulanda ademas ta deklara ku violashon di e derecho di outodeterminashon I e obligashonan I derechonan aki ta konta pa tur estado i paisnan, I ku negosashonan entre e poder  atministrativo I e representantenan di e pueblo no ta forma parti di ehersementu di e derecho di outodeterminashon di e pueblo, i si e negosashonan riba futuro koperashon wordu usa pa influensia e akto di eskoho liber di e pueblo, esaki ta bira un interferensia illegal I ta
violashon di derecho di outodeterminashon di e pueblo. I si dor di esaki e outorisashon pa separashon a wordu optene pa e estado atministrador dor preshon di kualke forma sea riba e pueblo o e representantenan, Hulanda ta konklui ku: dor di e karakter absoluto I  inkondishonal di derecho di outodeterminashon, violashon grave di derecho di outodeterminashon ta obliga tur estado i paisnan, pa no rekonose I yuda mantene e situashon krea komo resultado di e violashon. E kaso di islanan Chagos ta indika klaramente e hipokresia di e gobierno Hulandes ku ta mantene un dobel moral bao di e ley di  outodeterminashon predikando deklarashonan na komunidat internashonal riba dekolonisashon ku nan nunka lo a pensa ku lo yega na nos konosementu, mientrastantu ku nan mes ta violando e mesun derechonan aki di e pueblonan di Bonaire I Sint Eustatius.

Comments

comments