NAMA y F1403 contento cu Expo “Caribbean Ties Aruba”

Museo Arqueologico Nacional Aruba y Fundacion 1403 ta hopi contento cu a logra trece e exposicion internacional temporario di NEXUS 1492 “Caribbean Ties/ Lasonan Caribense” pa Aruba. E exposicion aki lo habri pa publico dia 22 di mei venidero na Museo Arqueologico.

Museo Arqueologico Nacional Aruba (NAMA) ta hopi agradecido na NEXUS 1492 cu e regalo di e exposicion aki y na Fundacion 1403 (F1403) como tambe Ministerio di Cultura pa e ayudo haya pa logra haya e exposicion “Caribbean Ties Aruba” na su localidad. Na e momentonan aki a cuminsa traha cu e set-up di e exposicion aki den e sala di exposicion temporario di Museo.

E exposicion “Caribbean Ties” ta e finalisacion di e proyecto NEXUS 1492 lidera pa Universidad di Leiden den cual a traha cu diferente instancia di diferente pais den e region di Caribe. E proyecto di investigacion importante di NEXUS 1492 a haci cu entre otro NAMA di Aruba, a haya e oportunidad unico pa haci investigacionnan profundo, cu profesionalnan den diferente ramo di experticio. For di e investigacionnan aki a sali hopi informacion y a surgi e idea pa bin cu un exposicion. E exposicion “Caribbean Ties”, cu ta mustra e patrimonio y cultura Indigena y su balor contemporaneo, lo habri na diferente pais den Caribe den e luna di mei rond di e fecha di Dia Internacional di Museo, cual ta 18 di mei.

Mester menciona cu e coordinadora general di e proyecto pa yega na e exposicion “Caribbean Ties” ta Tibisay Sankansting Nava, cu ta un hoben Arubiano trahando na Universidad di Leiden den e facultad di Arkeologia hunto cu profesor Hofman cu ta lider di e proyecto Nexus 1492. Na NAMA e proyecto “Caribbean Ties Aruba” ta ser lidera pa Suzette Boekhoudt, colaboradora educativo, cu sosten di su colega Norwin Maria.

Museo Arqueologico hunto cu Fundacion 1403 ta hopi contento y agradecido di a ser involucra den e proyecto aki for di e comienso y cu a haya e oportunidad di por a contribui cu nan experticio na e exposicion internacional aki.