Nahliel, Miiguelxx y Rebel promoviendo album nobo La Triologia Salas na Colombia

Mad House Music Group (MHMG) a sali rumbo pa Medellin, Colombia, pa asina promociona e album nobo titula “La Triologia Salas” di e artistanan local Nahliel, Miiguelxx y Rebel. E canticanan riba e album aki ta completamente na Spaño y riba nivel international. E meta ta pa yega leu den e musica Urbano, manera e artistanan grandi di Colombia, Puerto Rico, Republica Dominicana.

E artistanan aki a pasa na diferente medio di television y radio caminda cu nan a estrena e cancion promocional titula “Sé”. E reaccion ricibi na Medellin tabata uno sumamente positivo y pa esaki nan ta gradici na tur cu a sostene y yuda nan logra e soño aki bira uno realidad. Sigur e hobennan aki ta riba un bon rumbo, promocionando nan produccion nobo y tambe e isla di Aruba.

Segun Rebel, e album tin canticanan varia cuminsando desde Dance Hall pa Rap. Tin un flow di Hulanda y Africa den dje. A purba di no tin un solo genero di musica, pero nan kier expande mirando den cua genero nan ta sobresali mas. E produccion di e cantica ta haci entre nan tres, unda cu cada uno a compone nan mesun tema, asina Nahliel a expresa. MHMG a traha cu diferente productor, tanto di Colombia como di Aruba, pa haci e pistanan. Nan a traha cu e productor Gabi Cali, kende a traha cu artistanan manera JBalvin, Bad Bunny y Ozuna.

Por haya e album riba tur e plataforma nan Digital y e Video Musical riba YouTube.