Nada no a cambia na OAA: Minister ta keda insisti riba “losse uren”

Despues cu Minister di Enseñansa, dr. Rudy Lampe a reuni cu e docentenan di Openbare Avondleergangen Aruba (OAA), e docente di carpinteria y alabes vocero di e docentenan, Juancho Rasmijn, a comenta cu cos a keda mesun cos.

Den e reunion di siman dialuna, a palabra cu e Minister, cu lo bay traha un aña mas e sistema di overuren. E Minister a keda di duna un contesta e siman eynan mes. Riba diabierna merdia, Rasmijn a haya un mensahe di e Minister, caminda cu e ta indica di e proposicion cu e tin pa e docentenan. E proposicion tabata completamente otro di loke a palabra.

A palabra cu e Minister un aña mas, den un fase transitorio, cu e por haci su cambionan. Pero den e mensahe di diabierna, e ta indica cu ta bay traha te cu dia 31 di december overuren y dia 1 di januari 2020, den un sistema nobo, bao di un otro fundacion, ta bay traha e ora losse uren.

Nada no a cambia na OAA: Minister ta keda insisti riba “losse uren”

Nada no a cambia na OAA: Minister ta keda insisti riba “losse uren”. Click link pa mas https://24ora.tv/2kCecnd

Posted by 24ora on Tuesday, September 10, 2019

E docentenan a indica na e minister cu e ta bisa cosnan cu no ta cuadra. A palabra cu e minister overuren pa un aña mas. E Minister a keda para riba su ponencia cu ta asina e ta bay keda y cu e ta bin cu un sistema nobo den enseñansa y haci cambio.

Ta compronde cu ta bin cambio, pero e mester sosode na un manera structura y responsabel.

Dia 27 di augustus a bin scol y e minister a bisa nan cu nan lo cuminsa traha losse uren. Lo bin cambio den enseñansa, apenas un siman cu tin cu start OAA. E minister no ta bezig ta responsabel cu den un tempo asina cortico bin cu cambio. E docentenan a kere cu nan lo bin traha normal manera semper, nan a bin haya cu e sorpresa eynan y te ainda no tin nada cla, no tin ni rooster. No sa si ta bay start mes of ken ta bay start of con.

Segun Rasmijn esaki ta prome biaha den historia. El a traha mas di 30 aña den OAA y ta prome biaha cu nada no ta cla pa cuminsa cu un aña escolar nobo. Ta tipo di cosnan cu no por acepta nan. A yega momento pa para riba y exigi e minister cu e tin cu haci loke el a palabra. Sea e ta para den su sapato of para banda di su sapato.

 

Den e fin di siman, Rasmijn a busca manera pa drenta den contacto cu Ricardo Croes, mandando un carta pa splik’e kico ta pasando. Sinembargo no a haya un contesta. A invit’e pa bin scol, pero no a tende nada di dje, mirando cu e ta presidente di e comision den parlamento di enseñansa.

 

Ta di compronde cu den Conseho di Minister a firma un decision pa e cambio aki bin. Ta kere cu pa e cambionan bin, mester a yama e docentenan di antemano prome cu vakantie, papia cu nan, splica nan  kico ta e cambio. Kico e docentenan kier. Pero tur docente ta bin traha y no sa kico lo bay pasa.

Ta pa e motibo ey a busca manera pa tuma contacto cu prome minister, pero tampoco no ta haya contesta. Ta kere cu aki derecho di e docentenan ta wordo trapa y ta net e gabinete aki ta papia di integridad. Unda e integridad di e docente a keda? Ta trap’e, ta atach’e. Si ta papia di integridad, mester tene tiki mas cuidao y duna respet pa e docentenan pa e trabao cu nan ta haci.

 

Ta tende Minister bisa cu ta un side job nan tin. Rasmijn a menciona cu nan ta docente den dia y docente anochi. Ta keda na cada ken, si e kier traha side job. Pero ta trata aki di un trabao di docente, den dia y anochi.

Comments

comments