Nada ainda di lancha biniendo Aruba cu a sink cu 28 persona

4186

Te ainda familiarnan na Venezuela no a haya informacion di kico a pasa cu nan hendenan cu dia 18 di maart ultimo a sali for di Venezuela rumbo pa Aruba riba un boto cu na caminda a sink.

Extraoficialmente a bin compronde for di informacionnan di Venezuela cu cuatro ocupante di e boto cu a haya problema, entre nan e capitan, a salba nan bida, di cual dos a keda deteni y dos a huy di husticia. Esaki ta e informe cu a keda publica riba e corant di Falcon cu yama Nuevo Dia.

Segun e publicacion, e buskeda di e nave ta sigui na costanan di peninsula di Paraguana pa 28 persona kendenan abordo di un boto sin nomber, tipo peñero a sali di e area di Tiraya (Falcon), cu destino pa Aruba.

Segun e informe, nan a sali for di e costa eynan di forma clandestino un total di 32 persona (ilegal). E boto aki tabatin demasiado hende abordo pa cual el a haya problema dilanti di e costa di Piedras Negras, banda di un nave cu ta recoge cabaron.

Prensa a haya informe cu cuatro ocupante a landa yega te na oriya. Dos di nan a keda identifica y deteni como supuesto cabesnan di un red di trafico di persona. E otronan a huy y ta busca pa husticia.

Di acuerdo cu testimonio di piscadonan di e zona, haci na e periodistanan di Nuevo Dia, e sobrevivientenan a conta cu e lancha a confronta problema y a sink dilanti e “camaronera”.

Ta a base di e informacion aki cu famia a bati alarma cerca autoridadnan y a mobilisa un operacion di buskeda den e zona, den cual a participa ademas di instancianan concerni di Gobierno tambe grupo di piscado.

Entre esnan desapareci tin dos mucha y tres hende muhe. Un di nan ta Estafany Yormary Contreras Martínez. Otronan cu ta wordo busca ta Ender Manzano, di 22 aña, y Juan José Hurtado Colina.

Aruba

Por corda cu e mesun dia ey Polis Maritimo a topa cu un boto local riba cual tabatin 5 persona cu ta ilegal na Aruba. E dia ey autoridadnan a informa cu a detene e capitan.

Comments

comments