Awe falta net 1 aña pa eleccion 2021 y e partido di mas bieu di Aruba, esta AVP, semper ta cla pa eleccion. Nan ta kere cu e enfoke mester ta mas pa traha hunto pa futuro.
Den pasado a traha hunto y esey a florece entre otro un SVb, APFA, cu awe den e crisis por duna e sosten cu ta dunando. Lider di Fraccion AVP, parlamentario Marlon Sneek, a bisa cu sector social a haya mas atencion. E retonan cu tin awe ta keda grandi manera desempleo y banda di dje mester percura pa economia crece.
Prome cu COVID-19 e economia di Aruba tabata den crisis y no tabata crece. Tin di mira un AZV cu cada bes ta pidi mas atencion, mester di mas fondo y garantisa e servicio cu kier duna cada conciudadano. Ta enfokenan importante den e siguiente gobernacion. AVP tin e pensamento cu mester traha y di tin un gobierno capas di respeta su partnernan.
Partido AVP
J.H.A. “Henny” Eman a funda “Arubaanse Volks Partij” (AVP) na aña 1942. Lidernan desde fundacion tabata J.H.A. “Henny” Eman (welo), Cornelis A. “Shon A” Eman, Dominico Guzman Croes, Rudy Frank, Chibi Croes, J.H.A. “Henny” Eman, Robertico “Tico” Croes y M.G. “Mike” Eman. Na tur a participa den 28 eleccion. Record maximo di voto: 33,103 (2013) y Record minimo di voto: 1209 (1977). Den ultimo eleccion na September 2017 e partido a logra 23,385, manteniendo su mes como e partido mas grandi di Aruba, pero bayendo atras di 13 pa 9 asiento. Ideologia di AVP ta regional, democrata Cristian & conservador.