Na Turibana ladronnan ta activo riba material di construccion

Dialuna mainta na cuater diferente cas den construccion, polis a bay tuma nota di un situacion di ladronicia.
Prome informe a drenta cu nan lo a horta den un container na un cas den construccion na Turibana y ora cu polis a yega, nan a haya trahadonan y esnan cu ta doño di e material cu tin den e container, notificando cu nan a kibra e container.


Nan no a kibra un container so, nan a kibra cuater container. Na cuater diferente cas den construccion tin un container poni cu material y ekipo di trabao. Eyden nan a kibra y drenta bay cu basta material cu tabata tin e momento ey warda.


Polis a tuma nota di tur e informacionnan aki. A haci denuncia y asina a continua cu lo sigui busca wak si por haya esnan cu ta responsabel.
E ladronicia aki mester a tuma luga durante fin di siman, ora cu e trabaonan di construccion no tabata tumando luga y probablemente lo tabata den oranan di anochi pa marduga.


Caminda cu tin e ladronicia cu a tuma luga, tin algun figura ta biba cu ta horta constantemente y tin problema cu droga.
Polis tin atencion pa e caso aki. E containernan tabata cera na lock y nan lo a kibra e lock pa comete nan fechoria.

Comments

comments