E acuerdo cu Corsou a firma dia 15 di Maart ultimo, ta un acuerdo entre Reino y Merca y Corsou naturalmente. Como prome minister, representando Corsou, pasobra ta regarda Corsou como hub logistico pa ayudo humanitario, por a firma esaki.
Segun prome minister di Corsou, Eugene Rugghenaat, e acuerdo ta entre Merca y Reino Hulandes, no cu Hulanda, sino Corsou. Den e cuadro eynan USAID, cu ta e organisacion cu ta provee ayudo humanitario pa Merca rond mundo, alimentacion, remedi, etc., nan lo manda nan prome carga pa Corsou como prome fase pa asina ey warda esakinan den depositonan, specificamente cuminda, caminda e ora ey na momento cu tin un apertura pa por trece esakinan pa Venezuela, manera cu a bisa, no na un manera forsa, pero ora tin un espacio pa na un manera sigur y tin garantia cu e ta wordo suministra na e pueblo Venezolano, esaki ta cerca di Venezuela pa e bay rapidamente.
Segun e prome mandatario, pa loke ta e tarea di Gobierno, ta pa coordina cu tur e stakeholdernan, esta coordina cu aeropuerto, den e caso aki, cuminda y otronan, posiblemente mester wak tambe otro luga di almacena, por ehempel friu pa remedi. Pero e operacion mes ta USAID ta haci’e den coordinacion cu compania y institutonan local.
Tin di compronde cu tin fondonan cu Merca a pone disponibel pa e paisnan cu pone nan mes disponibel pa yuda. Riba esaki, prome minister Rugghenaat a splica cu di fondonan no a papia ainda. Loke si ta asina cu loke a acorda ta, cu USAID den e caso aki lo mester paga pa tur e servicionan. No ta gastonan cu Gobierno ta carga y a bisa cu caminda por, nan lo cumpra local tambe. E ora ey esaki ta facilita, pasobra bo ta scapa transporte y e ora ey ta mas facil pa organisa tambe e suministro pa Venezuela na e momento ey. Esey ta e palabracionnan pa loke ta gasto.
Henter e problematica di Venezuela ta afecta economia. E mandatario a splica cu Merca no a papia di fondo, sino a pone dilanti e riesgonan y e impacto di e desaroyo of situacionnan na Venezuela, por ehempel riba e refineria y tambe e sancionnan di Merca, con e ta impactando e sector energetico y petrolero. Den e cuadro ey tin conversacionnan andando na Washington pa wak con Merca lo por acomoda Corsou den esaki pa e maneho y sancionnan dirigi na PDVSA y Venezuela, etc., no impacta e pueblo di Corsou. Pero esey ta algo cu ta andando awor aki.
