Na memoria di tata di cultura: A lansa buki “Arte pa Padu”

646

Fundacion pa promove cultura na honor di Padu Lampe, miho conoci como Fundacion Padu Lampe, a tene un celebracion pa lansamento di buki relaciona cu arte di Padu Lampe. Esaki a sosode net un dia prome cu Padu Lampe a cumpli su prome aniversario di fayecimento. Un grupo di amantenan di arte y cultura a atende na e ceremonia special aki.

Na e momentonan aki e fundacion tin tres proyecto. E prome proyecto ta e digitalisacion di tur documento y potretnan di Padu. E di dos proyecto ta digitalisa composicionnan di Padu, pasobra el a haci di dje na un manera hopi diferente. Padu tabata toca riba piano y tabata graba esey apart riba un cassette, despues e tabata coy otro cassette y canta.

Awo pa rescata e cassettenan cu tin 30 pa 50 aña bieu, Ivan Quandus ta digitalisando nan pa uza y tambe lo skirbi e blad muziek cu ta keda den uzo. E di tres proyecto ta e buki di arte di Padu. Alice van Romondt, presidente di Fundacion Padu Lampe a crea un buki cu lo keda algo valioso pa historia, skirbi pa Stan Kuiperi. E layout di buki ta hopi diferente na otro ilustracion, pasobra e ta completamente na color. Stephan Maas tabata encarga cu e layout di buki, di cual a imprimie na Hulanda.

Diahuebs nan a presenta e buki na Gobernador y diabierna na Conseho di Minister. Den un celebracion na Patio 15, Fundacion Padu Lampe a gradici e dos fondonan cultural, esta Prins Bernard Cultuur Fonds y UNOCA, pa nan cooperacion di por a yega asina leu. Diabierna anochi pa prome biaha e directiva di fundacion a mira e buki di Arte di Padu Lampe. 

Autor di buki Arte pa Padu, Stan Kuiperi, a splica cu e publicacion tabata di Fundacion Padu Lampe, pero su tarea tabata pa cuminsa registra, conserva y promove tur trabou cu Padu Lampe a haci pa Aruba. E buki ta un resultado di e esfuerso haci. E buki ta trata riba e cuadro- y pinturanan cu Padu a haci desde su 16 aña te su 95 aña. Ta trata di un decada di 8 pa 9 di pintura, di produccion, algo cu ta historico na mundo completo. Banda di esey tur e trabounan cu Padu a haci, esey ta e inspiracion cu a cuminsa cu e publicacion aki.

E buki ta completamente na color y ta costa 50 florin. E ta na benta na Patio 15, na Boekhandel Van Dorp y cerca miembronan di directiva y cerca autor Stan Kuiperi. E proximo proyecto ta di comberti e cas di Padu den Beatrixstraat den un Museo interactivo cu lo hiba su nomber Museo Padu Lampe.

Un hecho remarcabel y skirbi den e buki, ta cu Padu ta e prome y te con leu cu nos sa, e unico pintor Arubiano cu a partidipa den World Fair na New York den añanan 60! Ningun otro pintor di Aruba no a yega di participa na un World Fair. Na principio di otro aña lo organisa un anochi pa publico y amante di arte den hardin di Departamento Arubiana di Biblioteca Nacional.

Durante e anochi aki e autor di e buki, Stan Kuiperi, lo ofrece un charla tocante “E Arte di Padu”, un analisis hopi interesante di un personahe hopi interesante mes!
E fundacion a lanta na aña 2000 tempo cu Padu a cumpli 80 aña di edad. Riba initiativa di e pintor Julie Oduber (qepd) a organisa un concierto grandi cu participacion gratis di un grupo formal di artista na Cas di Cultura como regalo pa Padu. Despues di e concierto a lanta e fundacion na honor di Padu Lampe.

Desde aña 2017 caba Alice van Romondt ta presidente di e fundacion, el a sigui Landa Henriquez. E directiva ta consisti di Irais Sankatsin-Nava, Susan de Lange, Minerva Geerman, Robert Kip, Johnny Scharbaay y Vivian Lampe. Ta bon pa resalta cu Robert, Vivian y Johnny ta den e directiva desde un principio.

Nomber di e fundacion ta Fundacion pa promove cultura na honor di Padu Lampe, popularmente yama Fundacion Padu Lampe. Su meta ta pa salbaguardia nos herencia cultural. Nan tin tres proyecto, esta digitalisacion di tur documento, manuscrito y potret di Padu, digitalisacion di su musica, entre otro 300 cassette di composicionnan cu nunca antes a wordo scucha. E proyecto di digitalisacion ta den man di Irais-Nava, Peter Scholing y Mena Semeleer.

E parti di digitalisacion di e composicionnan di e cassettenan ta den man di Ivan Quandus. E di tres proyecto ta e prome buki di arte di un pintor Arubiano, esta Padu Lampe, yama “Buki di Arte di Padu Lampe”, skibi pa Stan Kuiperi.