Gina Maduro, presidente di “Arubaanse Bond in Verplegende instellingen” (ABV) den un declaracion duna a splicacion kico ta e motibo cu ainda no a yega na un acuerdo den e negociacionnan cu a cuminsa algun aña caba pa e trahadonan di SABA (Fundacion encarga cu casnan di cuido di ancianonan).
Maduro a recorda cu na momento cu nan a cuminsa move den sector di cuido na Aruba dos aña pasa, tur CAO-nan a caduca. A logra un CAO di 3 aña pa IMSAN, cu un aña a pasa caba, y recientemente a finalisa e CAO nobo pa Hospital, Laboratorio Bloedbank y Respaldo cu ta trece tres aña di trankilidad pa e trahadonan. E unico cu falta ta SABA.
Segun e ta splica, ambos banda a bay di acuerdo pa wanta e negociacionnan un rato, mientras cu ta finalisa cu e proceso di “recht trekken salarissen” y pagonan. Esaki ta un problema cu ta data di 2002 mientras cu ABV a drenta den e sector di cuido aki na 2015. Finalmente ABV por bisa cu e problema aki ta soluciona y cu na januari, 2020 salario di e 32 trahadonan aki ta keda ahusta. “Nan a haya nan carta caba cu nan salario ta bay wordo ahusta pa evita acumulacion,” Maduro a bisa. Pa loke ta e pagonan mes, Minister Dangui Oduber a pone fondonan adicional den e “output subsidie” na e Stichting pa cuminsa paga e hendenan otro aña. Pero e partidonan mester sinta na mesa pasobra ta trata di un suma basta grandi. Gobierno ta bisa cu SABA a haya e placa aki caba, mientras cu e Stichting SABA ta bisa cu esaki no ta e caso. SABA a manda un carta unda ta splica kico a pasa cu e placa, pero SABA como dunado di trabou ta keda responsabel pa haci e pago aki.
ABV di su banda ta pensando pa hiba SABA Corte pa haya pago di e suma atrasa. Tambe door di e retraso di e CAO, e sindicato a palabra cu SABA cu e luna aki ta haya un pago extra di 250 florin, manera un bonus.
ABV ta kere si cu mester sinta na mesa y papia riba e sistema nobo cu a introduci pa subsidio cu ta duna e stichtingnan, cu ta e “output subsidie”. E formula aki ta cubri solamente e gastonan di operacion di e stichting. Desde 2017 tur e 21 stichtingnan ta haya ayudo via di “output subsidie”. E benficionan secundario no ta garantisa den e tipo di subsidio aki. E ta un riesgo pa tur esnan den sector di cuido. Mester garantisa e voorjaar- y najaarpremie.
Resumiendo e ta bisa cu ABV como representante di e trahadonan, ta dilanti so a bay den tur instancianan unda cu nan tin miembro.
