Recientemente Koninklijke Nederlandse Voetbalbond (KNVB) a pidi pa publico regresa stadion di futbol na Hulanda lihe. Segun e federacion di futbol Hulandes, e prome weganan cu a tuma luga despues cu a habri e opcion aki, a tuma luga sin ningun problema y te cu nan sa, ningun hende a contagia cu Coronavirus door di tabata den stadion di futbol.
Si e situacion actual continua pa mas largo, den cual e weganan di futbol ta tuma luga sin publico, KNVB ta teme cu algun club lo stop di existi. “Januari ta bira un luna masha importante pa nos”, asina Eric Gudde, director di KNVB a duna di conoce. “Nos ta spera cu e ora ey si lo permiti pa publico por bin mira futbol, aunke den cantidad limita. Pasobra si esaki dura hopi mas, tardi of trempan, e clubnan lo confronta problema serio di existencia”.
Den algun ciudad na Inglatera lo cuminsa yama publico bonbini den stadionnan di futbol desde otro siman. Na Hulanda a permiti clubnan, den e prome siman di e campeonato nobo, pa por ricibi publico limita den stadion. Ora cu e cifranan di contagio a cuminsa subi drasticamente atrobe, Gobierno a bira dicidi na fin di september pa cera tur e complehonan deportivo atrobe.
Koninklijke Nederlandse Voetbalbond (KNVB) ta e federacion di futbol profesional di Hulanda, funda dia 8 di december 1889. Bou di KNVB ta resorta tur sorto di wega di futbol, manera entre otro zaalvoetbal, beachsoccer, streetsoccer, schoolvoetbal, 45+ voetbal y hasta G-voetbal cu ta destina pa tur futbolista cu limitacion fisico of mental. Na 1904, KNVB tabata un di e 7 federacionnan nacional cu hunto a funda FIFA, e federacion mundial di futbol.
