Ruthmila Croes a splica cu nan ta desea pa Aruba tin un Stroke Union, caminda cu mundialmente e ta comproba cu ora cu bo duna den e prome 4 oranan e remedi cerca e pashentnan cu por haya e remedi aki, e chens pa bo sobrevivi e stroke, cu menos limitacion, ta hopi halto.
P’esey tambe hospital a inverti na 2016, den verpleegkundigenan specialisa den neurologie. Ta algo hopi bon y unico, segun Odor-Croes, cu ta wak tambe traha segun guia. Tambe hospital ta duna charla tur siman den hospital. Tin specialistanan cu a caba di duna masterclass. Tin hopi atencion pa stroke, pasobra Time=Brain. Ta mas miho pa preveni cu lamenta.
Mester ta conciente di nos limitacionnan cu nos tin na Aruba, pero una bes cu nos sa e limitacionnan, segun Odor-Croes, nos lo por ta mas conciente, ta biba saludabel, cual ta den nos propio man, cana, move. Hiba un bida cu menos stress. Tin cosnan cu nos no por yuda, por ehempel hende muhe ta hopi mas susceptible pa stroke.
E miho manera cu por haci awor aki, ta concientisa pueblo cu si acaso bo famia na cas, ta mustrabo un di e sintomanan aki, yama 911. Yega mas pronto posibel na hospital, pasobra kisas eynan bo por wordo yuda. Si bo tin famia cu a haya stroke, por fabor tene cuenta cu e ta bay afect tur hende rond. Uni hunto cu bo famia den e proceso dificil aki. Mirando e parti di concientisacion, kier a probecha pa invita pueblo di Aruba, riba dia 4 di October, na Centro Kibrahacha na Piedra Plat. Pa 7’or y mey lo bay tin varios dokter presente, henter e team pa hunto duna informacion y asina purba di scapa un bida mas pa motibo di stroke.
Pa esnan cu no ta logra dia 4 di October na Centro Kibrahacha, dia 25 di October, lo bay ta na Centro di Bario Brazil, pa 7’or y mey di anochi, unda tambe kier a duna informacion riba kico ta stroke, con pa biba despues di stroke y tur hende cu kier sa con pa evita stroke den nan famia.
