Na EPB Hato ta corigi alumnonan cu “bordlineaal”

Ta algun dia caba cu ta circulando un video via red social unda por mira Meneer Frans Dijkhoff ta dal un alumno cu un “bordlineaal” durante les di “Electrotechniek” na EPB Hato. E video ta mustra un actitud stringente di e docente, pa su forma di atende den klas cu su alumnonan. E video a cay den man di mayornan, cu a tuma contacto cu scol y a keha e forma di proceder. A entrega tur material den man di Stichting EPB pa nan tuma un decision awor riba posibel medidanan disciplinario contra e docente.

Banda di medaya di EPB Hato

E Director di EPB Hato, Ludwina de Cuba a informa nos cu “Dialuna un keho a drenta di un mayor (cu no ta e mayor di e alumno den e video) cu lo tin abuso físico a tuma luga den klas. Entretanto directiva a haya e video y a tende e meneer y alumno. Pa prome directiva ta lamenta profundamente cu e maestro a bay over na uzo di e bordlineaal pa hala atencion di un alumno. Esaki no mester a pasa y e docente a adimiti esaki y ta comprende cu su actuacion no ta responsabel pedagogicamente mira. Maske e alumno mes ta bisa cu no ta tuma esaki na serio y cu e ta bon cu e docente y cu ta wega esaki ta. Directiva cumpliendo cu su obligacion a manda su rapport di sucedido awe pa e bevoegd gezag cu den e caso aki ta directiva di SEPB, cu na su turno lo tuma un decision riba e caso lamentabel aki”.

Alumnonan general

Algun alumno di scol a vocifera nan opinion mesora riba red social y tambe a keha hopi riba e actuacion di e docente. Nan ta acus’e di mas biaha uza forsa bruto den klas contra alumnonan. Tin hende grandi cu ta cord’e for di tempo di John F Kennedy School y conoce pa ta hopi streng. 

Alumnonan di e klas

Mester menciona cu e mesun alumnonan a sinta awe cu Directiva di scol pa e director scucha kico nan tin di bisa. A kita tur 25 celular awe prome cu e encuentro. For di e reunion e alumnonan mes a bisa cu ta wega e meneer ta haci cu nan y ta su forma di atende. Nan no tin problema y tampoco kier pone keho. E alumno envolvi mes no ta sinti su mes maltrata of menasa. No ta e a keha tampoco, ni su mayornan sino mayor cu tin yiu na e scol, cu ta sinti cu e actuacion di e meneer aki ta inaceptabel.

Docentenan na palabra

Algun docente di EPB Hato cu a prefera di papia cu nos den forma anonimo a sigura cu e video aki ta manera “een storm in een glas water” pasobra por mira claramente cu no ta un sla pisa ni significativo. A subraya e hecho cu e klas aki ta esun mas problematico di henter e scol cu e alumnonan di mas dificil. Es mas, tin un docente a kita for di EPB caba pa via di e mesun klas aki. Ta como cu ningun docente no kier a tuma e klas, a opta pa busca Meneer Dijkhoff, siendo pendionado caba, pa duna un man pa purba educa e grupo aki. Meneer Dijkhoff tin un trayectoria largo y impecabel como Meneer di scol y hasta ta condecora pa Cas Real. Semper di su bida a traha cu mucha y como tal no merece algo asina.