Muzannin Wever: E gobierno aki no conoce necesidad di pueblo y ta goberna malo paso a drenta pueblo pa gaña

Como un di e oradornan cu a presenta diadomingo ultimo
durante e encuentro cu activista, dirigente di bario y boluntario di
partido AVP, Muzannin Wever a duna ehempel di cosnan por bay robes ora
cu un gobierno no scucha di su pueblo. Esey ta e diferencia entre e
gobierno cu tin aworaki cu esun di AVP.

“Si nos no drenta e barionan di nos pais pa scucha y gana e confiansa
di pueblo y mustra con AVP lo atende cu nan preocupacionnan, otronan
lo bay den bario y bo lo haya un otro gobierno cu otro metanan den
Cocolishi! Nos ta wak y biba e realidad ey awe!” Wever a expresa,
bisando tambe na esnan cu ta sinti cu nan no tin e conocemento of
kisas hasta e curashi pa haci e trabou duru y importante aki, partido
AVP ta bay organisa cursonan y duna guia.

El a bisa cu kisas tin hende den e sala cu ta pensa cu nan no por haci
e trabou aki pasobra nan no tin e conocemento, of cu nunca nan a haci
e trabou aki, of cu nan no tin e curashi pa drenta un bario y un cas
di famia pa papia di politica. “Na esnan cu ta pensa asina laga mi
bisa esaki:

Pa loke ta curashi, no kere cu curashi ta un talento cu abo no tin.
Ora bo ta bon prepara, bo por combersa cu cualkier habitante den bo
bario; bo lo scucha y compronde nan preocupacionnan, y bo lo por
contesta cualkier pregunta of duda cu nan por tin.

El a sigura cu partido AVP no ta bay pidi su voluntario, dirigente y
activistanan bay haci un trabou, sin laga nan ta bon prepara pa esaki.
E ta un trabou sumamente importante pasobra “Abo por percura pa
partido AVP conoce miho posibel kico ta biba den curason y mente di
pueblo; pa AVP por goberna miho na beneficio di pueblo.”

Wever ta di opinion, y a expresa esaki na e publico di diadomingo
ultimo, cu e pio ehempel cu nos por tin di no conoce necesidadnan di
pueblo y goberna malo, ta e grupo di partidonan cu ta forma e gobierno
di nos pais awor aki! “Nan a cana den barionan di nos pais, pero no pa
scucha e necesidadnan di pueblo of pa informa pueblo di kico nan ta
bay haci.”

“Nan a bay den casnan y – disculpa mi pa e palabra mahos aki – nan a
gaña hende y priminti cos cu nunca nan tin intencion di haci. E
expresion “campaña ta un cos, goberna ta otro”, a bira e “campaña ta
gaña y gobernacion ta pa nos”! Nan a usa e voto y e confiansa cu nan a
haya di pueblo, pa beneficia nan mes y nan a bolbe lubida pueblo.”

E indignacion di e situacion aki so mester ta suficiente pa yena e
activista, dirigente y boluntarionan cu curashi y cu energia pa cana
di cas pa cas y convence habitantenan den tur bario, cu ta pa nos pais
ta haci e trabou aki, y cu hamas nan mester kere promesanan di
partidonan sin berguenza, sin moral, y sin escrupula cu ta uza bo
confiansa pa enrikece nan mes, mientras cu pueblo ta haya net
contrario di loke nan a priminti.