Fundacion Museo Arubano lo tene nan celebracion di 18 di maart cu actividadnan na tur nan museo, esta Museo Historico (Fort Zoutman), Museo di Comunidad (Nicolaas Store), Museo di Industria (water toren San Nicolas) y exhibicion di Carnival Euphoria.
E museonan lo ta habri e dia aki desde 1:00pm – 6:00pm pa asina henter comunidad di Aruba por pasa bishita. Aki nan lo por conoce un tiki mas di historia y cultura di Aruba.
E fundacion ta pidi un contribucion chikito di 2.50 florin pa persona. E meta di esaki ta pa sigui mantene e museonan cu ta den monumentonan. Ta hopi importante pa sigui mantene nan, pasobra mester haci uzo di materialnan special pa ora mester drecha algo. Tambe e colaboracion ta bay p’e parti educativo di e museonan. Nan tin diferente actividad planea pa haci den 2019 y tur recaudacion di fondo ta bay pa esakinan.
Museo Historico lo ta habri di 10:00am-6:00pm, lo tin bar y cushina bon surti cu cuminda criollo. Tambe lo tin mesanan cu cosnan dushi y e programacion lo ta uno hopi varia cu gruponan di baile, caha di orgel, cantantenan di e festival di Himno y Bandera. Di 4:00-6:00pm lo tin Nfuzion.
Na San Nicolas tin 2 museo cu ta Museo di Industria y Museo di Comunidad. Tambe tin e reciente exhibicion di Carnival Euphoria den edificio di ex Greenhill supermarket. Lo tin un programa elabora tambe na museonan di San Nicolas pa loke ta bailenan folklorico, gruponan di baile. E dia lo inicia cu cantamento di himno na ambos museo door di Edjean Semeleer y Veroushka Krosendijk. Ta importante cu riba e dia aki orguyosamente por hisa Aruba su bandera. E fundacion ta gradici nan pa haci esaki.
Den e fundacion pa por a organisa e actividad aki tin 50 boluntario yudando y ta sumamente agradecido na esaki. Tambe na e sponsornan cu a haci e dia aki uno posibel. Ta invita henter comunidad di Aruba pa bishita e museonan, pasobra si nan no tin e muesonan. Tur artefacto tin nan storia y cada museo tin nan identidad. Pasa bishita y colabora cu nan y bin festeha e dia grandemente.
