Situa na un punto strategico di Oranjestad Museo Historico Aruba (MHA) ta un di e museonan mas stima di nos isla. E simpel hecho cu e edificio aki ta marca un punto importante den nos historia ta hasi di dje un munumento carga cu balor simbolico pa cu nos desaroyo.
E edificio remarcabel aki ta data di 1792 na momento cu un comision militar na Willemstad a dicidi pa construi e fort pa proteha e teritorio Aruba en bista di disturbionan cu a surgi den nos region relaciona cu ideanan revolucionario. Playa Caballos (Paardenbaai) na e momento aki tabata desaroyando como un puerto cada bes mas activo y poco decada despues a dicidi di cambia e nomber di e pueblo aki pa Oranjestad (na honor di cas real Hulandes), accentuando e expectativa grandi pa cu e pueblo y teritorio aki. 
Na momento cu por a conta cu e proteccion necesario cu Fort Zoutman a bin ta brinda mas y mas habitante a establece nan mes na Oranjestad en busca di un miho futuro. E funcionnan di defensa, faro, oloshi di pueblo, oficina di gobierno, kazerne di Polis (pa menciona algun) cu tempo a pasa pa historia y mas bien cu tempo a adkiri un funcion simbolico como testigo silencioso pa cu e desaroyo di e isla y alabes sintimento di identidad, preservacion di patrimonio y herencia cultural a bira relevante na e sitio aki. Museo Historico Aruba a habri 35 aña pasa cu meta pa presenta di un miho forma posibel diferente aspectonan relaciona cu nos historia cultural. MHA, como e prome museo den e structura di Fundacion Museo Arubano (FMA), tambe ta fungi como un ehempel pa preservacion di nos patrimonio historico Arubano y desaroyo di mas museonan na Aruba.
Na e momentonan aki ta preparando un exposicion adicional cu lo ser presenta den e museo aki pa fin di aña pa asina elabora riba e diferente temanan treci dilante den e espacionan di Museo Historico. Cu e informacion adicional contextual aki FMA ta spera di por stimula interes pa mas conocemento, investigacion y rescate di nos herencia cultural. Tambe ta evaluando plannan pa restaura y engrandece e espacionan di e museo aki pa asina garantisa cu e lo por
carga cu su funcion actual como museo pa hopi tempo mas. Pa Museo Historico Aruba, situa den Fort Zoutman, ta un honor y tin e responsabilidad grandi pa sigui e pasonan di esnan cu a bringa pa salvaguardia y rescata e monumento aki for di inicio y cu a crea e museo aki na aña 1984. Fundacion Museo Arubano, cual a ser institui un decada despues tin como meta
principal pa preserva, proteha y promociona nos patrimonio cultural. Museonan ta hunga un rol sumamente importante den desaroyo di un pais y ta ofrece un refleho mas profundo di sucesonan y balornan cu a marca nos pasado y forma ken nos ta.
Cultura di Aruba en particular ta enfrenta retonan grandi pa por rescata mas tanto di nos herencia cultural cu ta posibel, mirando e desaroyonan cu continuamente ta sigui na un ritmo acelera. Esaki ta accentua e urgencia pa e sector aki efectua su labor debidamente. E meta principal ta pa garantisa futuro generacionnan conocemento y acceso na nan historia pa asina nos cultura tambe forma parti di e Aruba sostenibel cu nos tur ta anhela.
