Museo Arkeologico a duna charla con Antropologia y Arkeologia ta combina cu cambio climatico

Estudionan manera Antropologia y Arkeologia combina hunto cu cambio climatico tabata temanan menciona durante di un presentacion na Museo Arkeologico. Corinne Lisette Hofman ta profesor di Arkeologia Caribense y ta traha na universidad di Leiden y tambe na e instituto real Hulandes pa estudionan di Asia Sur y Caribe y e ta conta cu tin topiconan crucial manera cambio climatico.

Hofman ta busca di sa e prome interaccionnan cu ta trece hende cu e ambiente na Aruba cu ta bay bek mas di 3 mil aña atras. Di unda e hendenan aki a bin tambe tabata tin cambio climatico.

E islanan di Aruba, Boneiro y Corsou a wordo alcansa pa un tsunami por lo menos 4 mil aña pasa. Esey ta cuadra cu e yegada di e prome habitantenan na e isla.

Museo Arkeologico a duna charla con Antropologia y Arkeologia ta combina cu cambio climatico

Museo Arkeologico a duna charla con Antropologia y Arkeologia ta combina cu cambio climatico. Click e link pa mas 24ora.tv/2TNZMPQ

Posted by 24ora on Thursday, March 12, 2020

Si wak na Spaans Lagoen por ehempel, ta un area cu a haya evidencia di e prome personanan cu a bin aki for di e costa di Colombia of Venezuela. Na e momento ey tambe nan a haya nan mes confronta cu e medio ambiente.

Loke cu Hofman ta interesa ta a largo plaso, con e hendenan a adapta na e cambio climatico. Esey ta loke e investigacion ta trata, di e adaptacion social na cambio climatico. No ta pa wak riba cambio climatico den termino di temperatura of biento. E ta realmente con hende for di comienso di e prome habitantenan, a adapta na e ambiente, cu e reto di cambio climatico.

Den su splicacion Hofman a bisa cu e investigacion cu nan ta haci ta di un forma pa e apela na tur hende. Door di tin’e den Arkeologia, Antropologia, Arkitectura y hasta sostenibilidad, y door di combina tur e disciplinanan aki, ta alcansando un publico grandi, no solamente academico, pero hendenan comun y coriente riba e islanan, pa conscientisanan cu e ta un problema comun pa tur. No ta importa si bo ta un dokter of bo ta un antropologo of arkeologo, tur tin e mesun preocupacion. E ta concerni nan estilo di bida.

Antropologo cultural, Francio Guadaloupe ta traha na e Universidad di Amsterdam como tambe na e Academia Real di Ciencia di Hulanda. Tambe e tabata ex presidente di e Universidad na Sint Maarten y ta bibando na Aruba. E tabata na e evento na Museo Arkeologico, unda cu el a duna splicacion con e dia aki a bay.

Segun Guadaloupe e evento aki ta mas manera un consulta cu e publico. Nan tin un propuesta di investigacion cu ta tira un bista riba cambio climatico den un modo multidimensional.

Loke nan ta haciendo ta trece tur e elementonan aki y purba di puntra e hendenan na Aruba kico ta nan necesidadnan, gustonan y deseonan pa loke ta cambio climatico, pa asina por hink’e den e propuesta di investigacion, pa haci’e relevante pa e poblacion di e sociedad aki.

Guadaloupe ta contento cu e reaccion haya caba. E combersacion cu nan a haya, a haya bon feedback. Aruba un biaha mas ta experenciando awasero y e biento ta cambiando. Ta señalnan cu Antias menor, tabata p’afo di e faha di horcan pa hopi tempo, awo lo bay cuminsa experencia parti di horcannan atrobe. Mester pensa riba infrastructuranan, con e comunidadnan ta organisa y mester pensa comunicacion pa personanan, cual ta nifica arte.

Arte

Cambio climatico tambe tin un dimension artistico. Un di e cosnan cu Guadaloupe por pensa ta cu si bo wak e prome habitantenan di e islanan, e Amerindians, nan a haci hopi pintura. Nan tabata biba den ambiente sin coriente. Ora cu tabata scur, tabata scur y nan no por a mira kico tabata pasando. Nan mester a adapta na e medio ambiente. Adaptando na dje na e momentonan ey, sin e ciencia di awendia, atrabes di arte y spiritualidad. Cambio climatico tin un dimension artistico spiritual y religion y arte ta dos banda di e mesun moneda.

Persona cu tin arte, por ta no mester di arte y esun cu tin religion, no lo por tin arte, manera cu tin entendi.