Tabata diasabra dia 30 di januari ultimo cu polisnan a para un V-wagen, debi cu DVG a bay controla un turista den isolacion y a constata cu e no tabata na e luga indica. A topa cu ne riba caya y a par’e na altura di CITGO Boulevard. A dun’e un multa di 500 dollar pa no a respeta e instruccion. A oblig’e keda isola (cera) na un compleho di apartamento unda e compania di seguro ta cubri estadia forsa di turistanan contagia cu Covid-19.
Locual a pasa e turista aki, procedente for di Merca, cu el a bin pasa algun dia di vakantie na Aruba. Ora el a yega, el a test negativo. Ora di bay, segun e maneho nobo di departamento di salud publico di Merca, tur pasahero mester yega cu un test negativo. Na Aruba a test dos dia prome cu e biaha bek y e resultado tabata “zwak positief”.
Consecuentemente, e aerolinea a nenga di hib’e asina bek Merca, pasobra nan no kier core e risico cu Merca ta neng’e ora e yega. Esey a pone cu DVG a inform’e cu e mester presenta mesora na un compleho di apartamento, cu e compania di seguro ta huur specialmente pa acomoda pashentnan contagia cu e virus. A splic’e di e reglanan estricto di isolacion cu e mester atene su mes na dje y cual el a firma na entrada via e ED Card electronico.
E turista a splica polisnan cu e no tabata keiro sino e mester a muda di su hotel pa e acomodacion nobo unda a oblig’e bay keda. Tambe el a probecha di pasa supermercado pa cumpra su alimento pa e por pasa e siguiente 10 dianan na Aruba. A splic’e cu asina e cos no ta funciona y cu e mester haci uzo di un servicio di concierge cu lo bay supermercado pe pa haci compras.
E berdad ta cu for di maart 2020 pa awo, ta mas of menos 7 turista so a haya multa door di no a cumpli cu reglanan di sea isolacion of di cuarentena. Localnan tambe normalmente ta respeta e reglanan. E grupo cu mas a haya nan mes den problema cu multa pa falta di cumplimento ta e Latinonan bibando y trahando na Aruba.
