Diasabra mainta, den careda di 11’or, a surgi un problema na un adres na Shiribana, caminda cu un señora a bay reclama su “recompensa” di cosnan cu probablemente e mes lo a horta. Sinembargo e doño di cas, ni de bola kier a pag’e. Aki e problema escala!

Polis a bay atende cu e situacion y a bin topa cu e sospechoso Evelyne Maduro, kende por cierto algun dia pasa a denunci’e riba social media pa ladronicia. Ora el a mira Polis, el a cuminsa core, pero e no a bay mucho leu. Polis a gar’e y deten’e. Varios unidad mas a presenta na e sitio pa duna un man. E sospechoso, porcierto, conoci di Polis, a splica cu loke el a horta, e tabata hibando nan na e cas menciona y eynan el a bay busca su cen, pero e doño no kier a pag’e.

Pesey e problema a escala. Transportwagen a presenta na e sitio y a hiba e sospechoso pa Warda di Polis di Santa Cruz. Riba dje, na momento cu a ristr’e, a bin haya un pida piedra (droga) den su poder. Aki literalmente e dicho “Crimen no ta paga” ta aplicabel. Pakico mester paga un ladron pa haya bo cosnan bek? E wega cu e ladron aki a hunga, a sali’e di malo y tin cu bay duna cuenta di su actonan awo na husticia.

Comments

comments