Diahuebs den oranan di merdia pa atardi Polisnan a wordo avisa di un caso di robo di un autobus cu a caba di tuma luga.

Segun e informacionnan ricibi, e autobus aki tabata para na e parada dilanti edificio Doña Clara na Playa. E chauffeurnan di bus semper ta para un banda y warda te ora cu e bus yena pa nan ranca sali. Mirando cu e bus aki tabata bashi, e muhe ambulante aki a bula den e auto y a bay cun’e. Gritonan di esnan presente no a spant’e. E chauffeur doño mester a cana bay warda pa entrega keho, mientras cu Polisnan a cuminsa busca e muhe y e Van.

Nan a bin topa cu e vehiculo riba Avenida Watty Vos y a cuminsa un persecucion. Advertencianan pa e para e auto no a duna resultado, ya cu mas el a trot e auto. Den e careda aki e mester a pasa riba algo y dal e parti abou di e auto, ya cu e gearbox a kibra y a laga henter e caminda di rotonde, dilanti aeropuerto, bay ariba tur na azeta.

Un poco pariba di e rotonde di airport patruyanan a logra changa e muhe cu e Van y el a hay’e obliga di para. A detene mesora y transporta pa warda.

Segun por a compronde, e muhe ambulante aki ta conoci di a haci algo similar den pasado. Tristo ta cu e no tin caminda di saca placa pa paga e daño cu el a causa na e vehiculo aki, cu ta percura pa e pan di cada dia di dje.

Comments

comments