Mr. Ady Thijsen: Aruba a logra algo miho riba Geschillenregeling

Den un conferencia di prensa dialuna mainta lider di delegacion di Parlamento cu a participa na e reunionnan di IPKO (Interparlementaire Koninkrijksoverleg) na Hulanda, a tene un conferencia di prensa riba e “Geschillenregeling”. Mr. Ady Thijs den e conferencia tabata compaña pa drs. Marisol Lopez Tromp di POR y Rocco Tjon di MEP, kendenan tambe tabata forma parti di e delegacion.

Rueda di Prensa Extraordinario for di Parlamento riba IKPO

Rueda di Prensa Extraordinario for di Parlamento riba IKPO

Posted by 24ora on Monday, July 8, 2019

 

El a repasa historia con e lucha a cuminsa pa logra yega na un “Geschillenregeling”. Na 2010 a entrega un amienda den Tweede Kamer di Thijsen – Wever, cu a wordo aproba cu 140 di e 150 votonan cu por a wordo deposita. A papia di un instancia independiente cu ta atende cu aspectonan huridico y diferencianan di opinion cu tin. E ta considera esey e fundeshi y a sigui cana e caminda di dialogo na nivel di Gobierno y Parlamento. Na 2015 a bolbe presenta un mocion cu a keda acepta. Na 2016 Minister Plasterk a entrega un proposicion pero cos a cambia ora cu Secretario di Estado Raymond Knops a entrega su proposicion na 2018.

Inclusive, el a splica, e aña’ki a tene un reunion na Sint Maarten unda cu a bini cu un nota den cual ta pidi pa duna contenido na articulo 12A di Statuut, cu ta bisa cu si bini un disputa, mester tin un instancia independiente cu ta duna un decision “bindend” na final. Na Surinam atrobe a reuni y a haci palabracion cu na april ta bay lobby pa haya sosten pa e Rijkswet cu tabata poni riba agenda den e reunion di dia 2 di juli, 2019. 

Aruba a traha dos amienda cu a haya apoyo di Sint Maarten y Corsou di cual e prome ta pa haya un “bestuursrechtspraak afdeling” y e di dos ta papia di “Statutaire Rechtspraak”. Aruba a bay pa e prome pero ora cu a yega Hulanda pa lobby, e coleganan di Hulanda a bini cu un otro amienda cu tabata mas skerpi cu esun di Aruba y tabatin mas peso. Na final tabatin diferente Amienda, pero na final Aruba a logra loke cu e tabata kier. 

Parlamentario Tjon di su banda a splica cu e Geschillenregeling mester cumpli cu tres aspecto: e aspectonan huridico; e mester ta independiente y e decision cu e duna mester ta “bindend”. Manera cu e ley a keda presenta originalmente, no ta cumpli cu e tres aspectonan menciona. E concepto entrega door di Secretario Estado no tabata cumpli cu e pensamento di Aruba, pero na final a entrega diferente amienda cu ta cambia e indole di e ley manera cu el a wordo presenta. Loke ta nobo den e ley ta cu despues di tres aña ta bini un evaluacion, pa mira si e ta loke tur hende tabata kier. Den e concepto anterior, e islanan Caribense tabatin mester di aprobacion di Prome Minister di Reino pa cuminsa cu e procedura pero cu ley aproba, e islanan riba nan mes por cuminsa cu e proceso. Tambe ta para cu pa motibonan pisa, Hulanda por desvia di e conseho, pero via di un amienda a limita e posibilidadnan aki. A incorpora cu si nan desvia pa un di e tres motibonan menciona, nan mester hustifica esaki. E tres motibonan: si tin erornan procedural a wordo cometi; si bini circumstancianan nobo despues cu e decision a wordo tuma y si e conseho cu a wordo duna door di e organo por wordo interpreta di diferente manera.