Motor unit a ricibi helm nobo

“Un momento hopi ameno caminda por a combersa cu e agentenan policial di e motor unit caminda nan mes a indica otro plannan cu nan tin pa por eherce nan trabou mas miho ainda, y nos ta bay spera e documentonan en cuestion for di nan pa asina por cumpli cu e peticion aki cu nan tin.”

Diaranson merdia, durante un encuentro ameno na Bestuurkantoor, Minister di Husticia y Asuntonan Social Rocco Tjon, a haci entrega di helm nobo special na e unidad di motor di Cuerpo Policial. E unidad di motor, a indica cu nan tin un necesidad pa helmnan nobo, pa nan propio siguridad, cual ta e motibo tambe cu di parti di Ministerio di Husticia a percura pa presupuesta y realisa e proyecto aki debidamente.

Manera ta conoci, presupuesto 2022 a wordo aproba recientemente, diferente proyectonan relativamente chikito a wordo incorpora den e presupuesto aki, sinembargo nan ta proyectonan sumamente importante pa eleva siguridad di nos agentenan policial. Den cuadro di esaki, a haci entrega di e helmnan nobo cual lo eleva nan propio siguridad ora cu nan ta eherce nan taereanan riba nos careteranan.

Ta asina cu e helmnan bieu no tabata cubri e agente suficientemente, mirando cu e agente ta core mas riesgo di peliger. A base di esaki, a sondea pa diferente tipo di helm cu ta eleva aun mas e siguridad di e agente, y asina a yega na e helmnan aki. Locual tambe ta haci e helmnan aki special ta cu e tin protector pa wowo pa anochi y den dia. Di otro banda e proceso pa adkiri e bulletproof vestnan a finalisa y lo inicia cu e pedido pa cu e bulletproof vestnan pa tur e agentenan policial.

Siman pasa a elabora riba e proyecto di ICT caminda ta bay percura cu agentenan policial por haci nan trabou mucho mas miho, ta bay ekipa e wardanan cu camara y asina tin alrededor di 20 proyecto cu substancialmente lo bay eleva e siguridad y e servicio cu agentenan policial por brinda na nos comunidad. Banda di esaki tin proyecto mas grandi y infrastructural caminda ta bay muda diferente departamento pa e edificio di ex-Codemsa.

Si tur cos ta bon e proyecto di ley aki, lo wordo entrega na parlamento pa por trat’e, prome cu reces di Parlamento di Aruba na juli. Por ultimo, e mandatario a accentua e importancia di e parti di “bedrijfsvoering”, mirando cu na final di dia por presupuesta e fondonan, pero e ta necesario tambe pa e fondonan cu ta presupuesta ta uza pa por ehecuta e tipo di proyectonan aki.