Motociclista gara sin rijbewijs a resisti detencion

Diasabra anochi banda di 7or pasa tabata tin un persecusion. Polis a topa cu motociclista. E biaha aki un brommer cu un otro color y otro persona riba dje. Ultimo biaha cu a kita e brommer tabata na Shaba net prome cu cambio di aña.

E biaha aki banda di Kamay y despues den e caya di Del Rey Apartments a mira e brommer. A duna e motociclista señal pa para pero el a scoge pa core pa Polis. A cuminsa un persecusion tras di MFA 919 y cu a start na Kamay drenta Caya Calco y caba na Palm Beach.

Hasta na dado momento e motociclista tabata chercha Polis. E motociclista tabata bisa Polis cu e lo para. Berdad e tabata para y ora Polis baha for di e auto pa bay atende cune, e tabata sali core atrobe. E tabata core iresponsabel y causa trafico den peliger. Finalmente patras di Local Store a logra gare y detene.  Parce e brommer a paga. E detencion no tabata facil. E motociclista a resisti formal su detencion y mester a traha duro pa domine y controle.

Tin polis cu den e coremento a dal su curpa fuertemente y tabata keha di dolor. E Motociclista tambe a keda parcialmente herida. El haci hopi maniobra durante e proceso di detencion. Hasta su movecionnan a pone Polis pensa cu e tin arma riba dje. A pase un klap na cara. Prome cu esey a mande tera y el a keda riba lomba. Despues a logra bolter riba barica pa logra pone na boei.

A pidi pa dogcatcher y asina bay cune warda. Na warda a interoge y pone su declaracion y di Polis su accion riba papel. E brommer a keda para riba tereno di Local Store. E actuacion di e motociclista por tabata fatal tambe. Polis ta haci su trabou y no por laga tur violacion di trafico pasa bay. Bo core pa Polis e por sali di bon pero e por sali di malo tambe. Amigonan di e motociclista sin rijbewijs a presenta na e sitio. Un di nan ta doño di e brommer.

Despues cu e sospechoso a bandona e sitio den dogcatcher, e amigonan tambe a bay. Despues di algun ora di interogacion, a laga e sospechoso bay. Ultimamente Polisnan ta deteniendo basta chauffeur of motociclista.  Motibo ta cu nan ta core sin rijbewijs. Diariamente tin accidente y chauffeurnan of motocilistanan cu no tin rijbewijs. Esaki ta castigable y pesey Polis ta actua.