Tabata dia 11 di februari ultimo, den oranan di marduga despues di Caiso & Soca Monarch cu un auto a lora dilanti e motociclista cu consecuencia cu a dal den otro, net banda di ex cas di Gobernador na e crusada di L.G Smith Boulevard y Maria Christinastraat. E chauffeur di e auto a resulta bou influencia di alcohol y no a duna preferencia na e motorcycle biniendo for di ariba. E motociclista, e conocido Francisco F. “Chuplè” Silvania di 58 aña di edad, a resulta gravemente herida.
Tres dia despues, dia di San Balentin, riba 14 di februari a transport’e cu urgencia pa Bogota, Colombia. A intern’e den Clinica Santa Fé, unda Specialistanan mesora a lucha pa scapa su pia. Na Aruba e opcion tabata pa amputa su pia for di dje, algo cu e no por a acepta. Su casa, kende ta traha na Hospital di Aruba, a haci un apelacion riba e Dokternan di Aruba pa manda su casa Colombia pa nan scapa su pia. Nan ta consciente cu e lo ta un trayecto largo y no facil, pero “Chuplè” a opta pa acepta e reto.
Den e ultimo luna aki, el a pasa dor di 9 diferente operacion caba. Ayera ainda a somet’e na e ultimo operacion, den cual a kita pida cuero di su lomba y pone na su pia.
Awe e Specialista cu a oper’e ayera a bishit’e y a conclui cu e operacion a bay bon y cu e ta masha satisfecho cu e proceso di recuperacion. El a corda e pashent cu na final e lo por cana mescos bek, pero cu e lo ta un proceso largo. Ta pensa cu e por dura hasta 2 aña. E intencion ta pa den algun siman mand’e bek Aruba pa sigui recupera na cas y pa e regresa Colombia frecuentemente pa tratamento.
Falta ainda un operacion mas, cu lo ta aki dos siman. Pero un operacion mas estetico, den cual atrobe lo kita cuero di un parti di su curpa, pa pone na su pia. El a bisa nos cu e pia ta bibo y hasta e pashent ta move su dedenan y ta sinti e pia completamente.
Chuplè a bisa di ta masha contento di e atencion special cu Aruba ta brindando e. Ora el a bin na tino, el a haya 963 mensahe di whattsapp, di amigonan, famia y conocinan cu tabata pendiente p’e. Awor na Bogota mes el a ricibi bastante bishita di Arubianonan cu a pasa Bogota of cu ta aki pa tratamento medico. E ta contento cu e atencion di Dokternan aki y progreso di su tratamento.
Na final el a manda un mensahe si pa chauffeurnan burachi den trafico. E ta haya cu mester bin castigo severo. Na Colombia e nursenan ta bise cu aki bo ocasiona accidente burachi bo ta bay cera pa largo. Na Aruba un homber bou influencia a dal’e cu auto y su mañan caba e tabata liber te cu el a bay den Manuelito’s Bar pa sigui dal drinks manera nada no a sosode, manera su amigonan a cont’e.
E no ta haya ta husto, cu “Chuplè” ta den recuperacion y operacion, mientras cu e autor di su estado di salud awe ta siguiendo cu e mesun bida di bebemento, te ora e cobra un otro victima
