Un homber riba un brommer a accidenta su so den Stadionweg y a haya un lesion na su schouder cu a lague ta sclama di dolor.
Esaki a sosode den oranan di marduga. A pidi presencia di Ambulance y Polis den Stadionweg, un poco despues di Cas di Cultura. E homber aparentemente, segun e prome informe, a perde control, a dal den acera cu a causa cu e no tabata tin control mas riba e vehiculo.
Ta parce cu el a dal den un poste di luz tambe. “Yudami, yudami,” e homber tabata grita di dolor. Ta parce cu el a saca su schouder di luga, cual ta algo cu ta haci hopi dolor.
E Polisnan tabata trata di calm’e pasobra mas e move, mas e dolor ta aumenta. Por a nota cu e homber tabata hopi desespera.
Ambulance a yega, pone aden y a transporte mesora pa hospital.
Loke a hala atencion ta cu e brommer aki no tabatin number pega riba dje. No ta conoci si el a perde durante e accidente of e no tin number mes.
