Apenas e parada di Carnaval di Mucha di Oranjestad a caba di pasa dilanti Linear Park, cu pa algo pasa di 5:00pm a sosode un accidente entre un motorcycle y tres auto staciona den parkeerplaats riba Linear Park dilanti Talk of the Town.
E tres autonan cu a haya sla tabata un auto marca Hyundai modelo Tucson numera A-68255 color cora kima, un Toyota Yaris color cora numera A-6801 y un auto marca Chevrolet color shinishi cu number A-74685. E motorcycle tabata di marca Suzuki color preto modelo RGSX.
Testigonan na e sitio di accidente ta bisa cu e motociclista tabata “drift”, a mira huma bay halto y un holor fuerte di taira kima. Dado momento durante “drifting” pa un of otro motibo a laga “clutch” bay y e vehiculo a ranca bay dal den tres auto staciona den parkeerplaats. E motociclista a resulta herida.
Personal di Cruz Cora a yega mesora pa brinda asistencia mientras cu masha lihe e paramediconan riba Ambulance a yega tambe pa transporta e hoben motociclista pa Hospital pa ricibi tratamento medico.
Amigonan di e motociclista a sigura cu no ta mucho dia pasa el a cumpra e brommer aki. No a nota un nummerplaat riba e motorcycle tampoco, pues no sa si e tin number ni si e ta sigura.
