Djasabra 7 di sèptèmber 2019 alrededor di 18.48’or, Sentral di Polis a dirigí un unidat pa e kaya sin nòmber ku ta kore paralelo ku F.D. Rooseveltweg na altura di Gròt di Hato, pa un aksidente den kua tin un motosiklista enbolbí. Na yegada di e unidat el a bin topa un hòmber drumi abou, fuera di konosementu i ku heridanan na vários parti di su kurpa.
Mesora a pidi presensia di ambulans ku a transportá e víktima ku urgensia pa poliklínika. For di investigashon preliminar a sali na kla, ku pa motibunan te ainda deskonosí, e víktima lo a pèrdè kontrol riba su vehíkulo i aksidentá. Na momentu ku e unidat a yega, ya e vehíkulo ku e víktima tabata manehá, no tabata mas na e sitio.
Alrededor di 22.30’or Sentral di Polis a keda notifiká ku e víktima, e hòmber Daniel Alfredo Scoop nase na Kòrsou dia 23 di òktober 1999 no a sobreviví e aksidente i a fayesé na hospital. Investigashon den e kaso aki ta kontinuá dor di personal di e Departamento di Tráfiko, pa establesé ku eksaktitut kiko tabata kousa di e aksidente aki.
