Tin cierto publicacionnan cu a yama basta atencion y tin di haber cu historia di Aruba. E tin di haber cu dibuho, mescla, infrastructura. Yvonne Webb-Kock kende ta directora di Monumentenbureau, a conta cu nan ta un departamento di gobierno y hopi biaha hende ta wak Monumentenbureau como un departamento cu solamente ta drecha edificio, pero nan ta haci mas.
Nan ta investiga tambe y wak un tiki tambe na e historia. Den caso di e casnan floria, casnan decora, tin estudionan haci den pasado caba, pero ora cu a cuminsa na Monumentenbureau, a bishita varios hende grandi y ta scucha diferente teoria riba e casnan floria di unda nan ta origina of con e simbolonan a bin riba e edificionan aki.
Pa esey tambe tin cu bisa cu Monumentenbureau a wordo acerca pa un dama di Hulanda, kende kier a haci su estudio di Masters cerca nan pa su stage. E ora ey a scoge pa e bay haci un estudio mas profundo riba e materia di nos casnan floria. Su tarea cu el a haya tabata cu actualmente tin cuater teoria, con e dibuhonan aki a bin riba e edificio. E prome ta bisa cu e indjan a pone. Di dos cu tin ta cu cada simbolo ta wordo poni ora cu un yiu nace. E di tres cu tin ta simbolo ta wordo poni pasobra nos tin nos creencianan y ta pa nada malo pasa, pa e malo keda pafo di cas. Y e di cuater ta eigenlijk gewoon pasobra nos kier decor’e y haci’e mas bunita. Ora cu tin tesisnan asina, bo tin cu bay haci un estudio mas profundo pa bisa di unda el a origina, ken a trah’e, ki temporada el a wordo traha y esey ta loke e studiante ta haciendo awor aki. E tin e tarea pa acerca e estudio den diferente disciplina. Ta hayando hopi cooperacion di sr. Kelly, e arkeologo. Ta bay na Archivo Historico, ta papiando cu Ito Tromp, kende a skirbi un buki riba esaki y asina tin hopi mas hende, personanan cu ta biba den e casnan aki. Nan ta contribui den loke nan sa over di nan edificio of loke nan sa di e materia.
Pa Monumentobureau ta hopi importante pa sa ken e metslanan aki tabata, pasobra e ta un ofishi cu a wordo traspasa di tata pa yiu y asina den generacion di famia e ofishi di metsla di dibuho a wordo eherce. Actualmente Monumentenbureau tin 12 nomber y famnan ta Wolff, Christiaans, Maduro, Jacobs, Rosa, Semeleer, Henriquez y Tromp. Pero a tende cu tin mas. Pa no lubida ningun ta puntra pa comunidad duna un man. Pa nan sa cu un descendiente tambe a traha riba un di e casnan aki, a pone un dibuho riba nan. E casnan ta data di mas of menos 1850 pa 1950. Ta buscando hende cu a traha den e periodo ey. Mayoria ya a fayece, pero ta un honor pa por registra e ofishi aki tambe y e nomber di e hendenan cu a hinca nan curason den dje pa haci e edificionan aki mas bunita.
