Awe mainta 9:00am ta programa pa atende un reunion publico, aunke sin prensa y sin publico, den cual a manda yama Minister dr. Rudy Lampe pa responsabilisa su mes pa cu su maneho. Ta trata aki di varios peticion cu a drenta via specialmente fraccion di AVP den Parlamento. Pero mester bisa cu na varios ocasion e fraccion di MEP tambe a demostra malcontento of preocupacion cu decisionnan cu e mandatario ta tumando, como tambe fraccion di POR. Ambos formando parti di e coalicion.
Ultimo simannan aki, tanto e sindicato di docentenan, SIMAR, como tambe e sindicato di werksternan, SEPPA, a critica decisionnan di e mandatario un tras di otro. Ta parce cu e kier ehecuta varios cambionan drastico den enseñansa, memey di un pandemia y tur e demas retonan economico cu e crisis a trece cu ne. Memey di e crisis e ta evaluando pa pasa scolnan di Gobierno bou di fundacionnan y asina por sigui menciona. E comunicacion den e industria di educacion obviamente ta laga masha hopi di desea, pa cual constantemente su decisionnan ta lanta hopi critica y ta fomenta disgusto.
Hopi “onrust” den enseñansa
Mayoria cabesante di scol ta kehando riba e decisionnan, e hecho cu no ta envolvi esunnan trahando den e ramo y pio, e “timing” cu ta uza pa e cambionan aki. Den algun caso, hasta por deduci cu e cambionan ta contradictorio na otro. Den e proceso, ta nota cu docentenan ta recuri directamente na Minister Presidente mr. Evelyn Wever-Croes, enbes di Minister Rudy Lampe, cu ta e Minister encarga. Consecuentemente, Gobierno, por medio di e crisisteam, a frena of para varios decision di Minister Lampe. Pero na un dado momento, henter Gobierno ta bou presion pa e decisionnan aki, den cual docentenan a subi caya siman pasa pa protesta. Ademas, nos tur sa cu e crisis lo no dura pa semper y e autoridad di e crisisteam lo yega su fin.
A desvia di un reunion publico pa varios luna
E reunion publico aki di Parlamento ta bin despues di hopi luna di peticion. Tur biaha a logra pa, politicamente, uzando e base di un coalicion, pa evita un reunion publico pa evita cu ta bin un mocion di desconfiansa. Pero, ta parce cu MEP mes a fada di wanta tanto presion pa e partner mas chikito den coalicion. Hunto a dicidi pa toch yama e reunion y mira den cua direccion lo bay cu ne, dependiendo e actitud di Lampe mes como Minister y di Ricardo Croes como Lider di Fraccion di RED den Parlamento.
MEP na un skina politico dificil
De facto, politicamente MEP tin dos opcion awo. E prome y esun di mas drastico ta pa laga Rudy Lampe cay, votando na fabor di un mocion di desconfiansa. Esey lo conduci cu e mester baha como Minister y RED lo tin cu scoge un otro Minister di Enseñansa pa yena e vacatura. E di dos lo ta pa sostene su maneho y automaticamente MEP ta adopta tur e criticanan pisa cu tin bou di tur esunnan trahando den enseñansa, riba maneho di e mandatario. Den ambos scenario e fraccion di mas grandi den coalicion, cu awor tin 8 asiento, lo mester carga e peso cu e fraccion di 1 asiento ta treciendo cu ne. MEP lo no por sconde bou di e excusa mas cu Ministerio di Enseñansa ta di un otro partido den coalicion, pero lo mester carga e peso di e decision aki te september otro aña na momento cu yama eleccion….cu tur e consecuencianan.
AVP kier baha Minister Lampe
Aunke fuentenan oficial no a confirma esaki, tin tur indicacion cu fraccion di AVP den Parlamento, cu ta conta cu 9 asiento, ta dicidido pa manda e mandatario cas. Claro cu 9 asiento no ta suficiente pa e mandatario por sobrebibi esey. Si analisa bon, oposicion awor ta conta cu 10 asiento, hunto cu e miembro independiente Daphne Lejuez. Aunke ultimamente a nota cu e tin hopi opinion similar y asercamento politico na Ricardo Croes di RED. Cu e lo vota na fabor cu AVP den un posibel mocion pa baha un Minister di RED ta algo pa mira. Pero ainda falta 1 asiento mas, sea di POR of di MEP, cu mester sostene un eventual mocion di desconfiansa. Cu 11 asiento, bo ta logra manda un Minister cas, den cual Parlamento ta kit’e for di trabou, bisand’e cu e no tin sosten mas di e mayoria den Parlamento.
Mocion di desconfiansa
Un mocion di desconfiansa den Parlamento ta final di carera politico di cualkier Minister den sistema democratico di Reino. Ora Parlamento baha Bo, ta nifica cu bo no por conta mas cu e confiansa di e organo mas halto den nos sistema constitucional. Confiansa den un Minister of den un gabinete ta basa riba e “vertrouwensregel” cu ta dicta e funcionamento di Gobierno controla pa Parlamento. Normalmente ora cu pasa un mocion di desconfiansa, e Minister encuestion mes ta tuma su retiro. Den caso cu aproba un mocion di desconfiansa, Minister Presidente mester presenta un decreto na Gobernador caminda cu ta entrega funcion di e Minister en cuestion. Ambos caso por resulta den un situacion di crisis den coalicion cu por conduci tambe cu Minister Presidente ta disolve Parlamento y yama eleccion mesora.
Cu si esey lo sosode awe no ta conoci, aunke no ta premir’e tampoco. Na Aruba no ta usual cu ta aproba un mocion di desconfiansa pa baha un Minister y e Gobierno ta sigui den funcion. Na Hulanda si e tipo di practicanan asina ta sosode cu bastante regularidad, of e Minister mes ta renuncia prome cu yega asina leu.
Tocante Armando “Rudy” Lampe
Dia 30 di Mei 2003, dr. Armando “Rudy” Lampe a funda Partido RED. Na aña 2005 a participa na eleccion prome biaha y Rudy Lampe a logra 2.334 voto individual. Den e siguiente eleccion, el a bay atras drasticamente den voto y a logra retene 1.360 voto. Den eleccion 2013, Rudy Lampe a bay atras cu mita di su votonan y a haya solamente 613 voto y den eleccion di aña 2017 a bolbe cay y yega te na 466 voto. Esaki como tal ta e record di MENOS voto cu e ta logra den su carera politico, mientras cu pa RED e ta un record den cantidad di voto. E partido a inicia na 2005 cu 3330 voto, a cay na 2009 pa 2378 voto, na 2013 no a bal mas cu 1209 voto y na aña 2017 a subi te na 4166 voto. Ironia ta cu Rudy Lampe, naci dia 13 di januari 1958, un Doctorandus den Teologia y un maestro den sociologia, ora a haya mas voto a bira Parlamentario y awor cu su popularidad ta mas abou cu nunca, el a yega na e puesto anhela di Minister di Enseñansa, Ciencia y Desaroyo Sostenibel.
