Mocion di desconfiansa entrega y aproba den Parlamento contra minister Lopez-Tromp

2797

For di un reunion cu mester a trata e asunto di spearfishing, a caba den un mocion di desconfiansa contra minister Marisol Lopez-Tromp entrega pa fraccion di MEP y esey a indigna tanto fraccion di AVP como esun di POR.

Tanto parlamentario Arthur Dowers como lider di fraccion di RED, Ricardo Croes, a mustra abiertamente nan indignacion riba e proceder di e reunion, bisando cu nan a bin pa trata un tema, pero na final a dal un buelta di 180 grado.

Fraccion di MEP a presenta un mocion di desconfiansa contra Minister Marisol Lopez Tromp

Posted by 24ora on Thursday, October 15, 2020

Tanto Dowers como Croes a mustra cu e reunion aki tabata uno ilegal.

Ta pa e motibo ey mes e dos fraccionnan aki a sali for di sala di Parlamento pa asina no participa den votacion di e mocion en particular aki.

Fraccion di MEP lo a acusa e mandatrio pa actua contra principio di bon gobernacion, causando asina un kiebro di confiansa den e mandatario.

Tin manera un “heksenjacht” riba Marisol Lopez-Tromp: Tin un poder mas halto envolvi?

Ta tres biaha nan a purba di baha Minister Marisol Lopez-Tromp. E hecho aki ta manera cos cu ta keda piki riba e minister aki pa kico cu ta, mustrando asina cu tin un tipo di “heksenjacht”.

E mandatario a splica cu e tin entendi cu ta 10 voto tabata tin pa esaki. Esta 8 di MEP y 2 di POR y e otro miembronan di Staten lo a bandona e edificio.

Den e caso aki, 10 voto no ta un mayoria. Pero tin cu wak kico ta e resultado oficial despues. E ta agrega cu desde juni cu a pasa ultimo, a cuminsa un sorto di campaña pa purba di sak’e for di partido, despues purba di bah’e como minister, despues ta pa e retira toch. 

Despues a bin un comision pa bin hunto atrobe. Despues tabata tin prome y segunda tanda. Asina el a keda bay y cada biaha un reunion publico cu cuestionamento riba proyectonan cu tabata prome cu su tempo. Esun di spearfishing tabata e ultimo, e ta menciona.

Un poder mas halto

Lopez-Tromp ta sinti cu tin un poder mas halto cu kier impone den varios reunion y tin cu bisa cu con cu bay bin, e no a laga esey strob’e. E ta keda haci su trabao normal.

Pa loke ta e votacion, un biah mas tin cu wak con esaki tin cu ta interpreta. E tambe tabata presidente di Parlamento y mester tin 11 miembro, esta un mayoria den sala pa por vota y tuma un decision.

Si a conta cabes, e votacion aki no por a tuma luga. Apesar cu e no tabata eyden, tabata tin 10 hende den sala y e otronan no tabata den edificio. Awo e lo tin cu tende con ta interpreta e resultado aki.

E decepcion di Ricardo Croes

Segun minister Lopez-Tromp e por a scucha Croes y tambe den prome y segunda tanda caminda el a trece su punto di bista p’adilanti riba e situacion cu a surgi. E ta sinti cu desde cu Lopez-Tromp a cuminsa den e partido, ilustra cosnan cu no ta corecto y pa loke ta e ex minister cu el a sigui cu su cartera, e ta sinti tur esaki a inicia.

Lopez-Tromp ta keda duna su opinion. Nan por bin cu un mocion di desconfiansa, manera cu e contenido ta refleha no ta berdad, ta skirbi cosnan aden cu e lo bay haci.

Los di esey, masha tempo caba, for di juni, cindo luna despues, ta scoge pa haci’e den e reunion aki.

Bishitanan na Parlamento

Ultimo tempo, cada bes cu tin un topico, nan ta manda yama Marisol Lopez-Tromp. Sea ta dump na Parkietenbos, cu tin cu remedia cos den un dia of den dies dia, etc. Asina e tabata tur e tempo cu a pasa y awo tambe cu e gedoogbeleid.