Siman pasa Gobierno di Aruba a los fondonan pa realisa pago di Subsidio di Salario via banco di seguro social SVb. Gobierno a transferi fondo pa 1018 diferente compania, pa paga salario na 10.565 trahado pa no menos di 16,5 miyon florin. Aunke e suma ta mustra halto, ta como 600 compania menos cu a haya e ayudo aki na luna di juni.
Na luna di mei a paga 45,1 miyon florin na 1656 diferente compania, inscribi na SVb y na DIMP. Na luna di juni e suma a bira 39.4 miyon florin pa 1628 compania, pues poco menos cu luna di mei. Pero luna pasa na juli e suma na subsidio a baha considerablemente, y tabata unicamente 16,5 miyon florin pa 1016 compania. E suma cu Gobierno a paga luna pasa ta menos di mita cu e luna prome.
Riba nos pregunta, ta dicon e Subsidio di Salario por tin un variante asina grandi, a splica cu tin diferente opcion. Por ta cu e companianan envolvi a cuminsa opera y ta opta pa no tuma Salarissubsidie mas. Otro cos ta si cu hopi compania a cera nan portanan pa semper y a bati bancarota. Pero cuanto compania esey lo ta, no ta conoci ainda.
A splica nos cu den caso cu companianan cuminsa opera y ta haya entrada, mayoria bez ta traduci su mes den un suma menos pa subsidia. Pero e cantidad di empleado lo mester ta mesun cos. Den e caso specifico, e luna aki e ta como 600 compania menos, cu sea no mester di e ayudo mas of no tin sentido pa pidi yudansa pasobra e compania a bay bancarota.
