Aruba su representante pa Miss World Nurianne Arias ya caba tin algun dia na Sanya, China pa e elleccion di Miss World cu ta tuma lugar dia 8 di December. For di momento cu Nurianne a yega Aeropuerto ya caba hopi persona a reconoce y a pidi su persona pa saca potret cune y esey a pasa tambe na Hotel cual a causa un bunita impression tambe di e organisacion mes di Miss World cu por a mira y sinti caba cu nos representante ya caba tin e atencion eynan.
Ya caba diferente actividadnan ta tumando lugar na caminda pa e evento final. E candidatanan mester a haci un audicion pa nan Dances of The World den cual Nurianne a luci un trahe special diseña pa nos talento local Rhona Lemminga y un headpiece fabuloso traha pa Carlos Tromp y Boedoem, decora pa Jermaine Carasquero , tambe nan prueba di Talento unda Nurianne a toca riba piano bisti den un trahe blanco bellisimo diseña pa Endy Croes , Nan a participa den un parade cu trahenan tradicional di nan pais y aki Nurianne a luci un trahe folklore di nos isla danki na Freddy Tromp y The Popcorn Dancers.
Tambe nan ta preparando pa nan Head to Head Challenge den cual Nurianne a cai den grupo No. 17 , hunto cu Malta, Russia, Mexico, Spaña y Nothern Ireland. Nurianne ta sinti su mes hopi trankilo y hopi sigur di su mes, aunque e dianan ta largo cu yen di actividad pero nan ta gozando di e buniteza di China y mescos tambe sera conoci cu e candidatanan mas di serca. Un di e factornan importante tambe ta Social Media y pesey mes nos ta pidi tur persona pa yuda nos crea trafico riba e App di Mobstar, con pa haci esaki ta masha facil
Download e applicacion di Mobstar, riba bo telefoon, e ta gratis, log in cu bo facebook account of e mail , seach Nurianne Arias y follow e, like tur su postnan door di swipe esakinan na banda drechi y asina e puntuacion ta subi, ta importante si por bai tur dia wak postnan nobo y swipenan, lo ta great tambe si riba Instagram y Facebook por like and share y comment pa asina mas hende por follow nos representante. 
Riba Instagram bo por haña Nurianne como nuriannearias, tambe por wak potret riba Miss World Time y Miss World News y tambe riba Facebook Miss World Aruba.
Nos ta conta cu bo apoyo pa asina nos Aruba sigui destaka na Sanya China. Corda One Nation…One Crown
