Miss World Aruba 2019 esta Ghislaine Mejia ta den su ultimo preparacionnan prome cu biaha pa London, Inglatera pa participa na e certamen Miss World cu lo tuma lugar 14 di December 2019 an Excel London. E certamen aki ta conoci pa su esencia cual ta ‘Beauty with a Purpose’ y e aña aki ta conta cu mas di 120 participante di rond di mundo.

Durante preparacion Ghislaine a prepara un proyecto social cu ta den fase di culminacion cu Fundacion Eliezer. E proyecto a encera un colaboracion pa asina uni cu esnan bibando na e hogar di rehabilitacion di e fundacion aki pa traha un Greenhouse cu e proposito pa desaroya un proyecto di agricultura den dje.

Tambe Ghislaine a prepara den area di pasarela (top model), oratoria, talento y baile di Aruba y mas. Esaki ta diferente elemento cu ta forma parti di e competencia.

Un otro aspecto sumamente importante ta Multimedia. Cada candidata mester pidi apoyo na nan pais pa sigui nan pasonan via medio social y di comunicacion pa asina promove e certamen di Miss World.

Pueblo di Aruba por apoya Miss World Aruba dor di like, share y comment riba su medionan social riba Instagram, Facebook, Mobstar (pa download riba celular) y Twitter (pronto).

Pa apoya representante di Aruba mester download Mobstar, follow ‘Ghislaine Mejia’ y like tur su postnan. Tambe por apoya door di follow ‘Ghislaine Mejia’ via Instagram y ‘Miss World – Aruba’ via Facebook. Tur apoyo via medio social ta conta como punto pa avansa den e competencia.

Aruba ta keda cordialmente invita pa sigui Miss World Aruba su pasonan y apoya via medio social. Miss World Aruba ta conta cu tur apoyo di Aruba desde awor y durante e competencia na London.

Miss World Aruba ta gradici tur hende cu ta contribuyendo na su preparacion y participacion na Miss World.

Comments

comments