Miss World Aruba 2019 esta Ghislaine Mejia a yega London, Inglatera pa participa na e certamen Miss World cu lo tuma lugar 14 di December 2019 na Excel London. E certamen aki ta conoci pa su esencia cual ta ‘Beauty with a Purpose’ y e aña aki ta conta cu mas di 100 participante di rond di mundo.
Durante preparacion Ghislaine a haci un proyecto social cu Fundacion Eliezer. E proyecto a encera un colaboracion pa asina uni cu esnan bibando na e hogar di rehabilitacion di e fundacion aki pa traha un Greenhouse cu e proposito pa desaroya un proyecto di agricultura den dje.
Tambe Ghislaine a prepara den area di pasarela (top model), oratoria, talento y baile di Aruba y mas. Esaki ta diferente elemento cu ta forma parti di e competencia.
Un otro aspecto sumamente importante ta Multimedia. Cada candidata mester pidi apoyo na nan pais pa sigui nan pasonan via medio social y di comunicacion pa asina promove e certamen di Miss World.
Pueblo di Aruba por apoya Miss World Aruba dor di like, share y comment riba su medionan social riba Instagram, Facebook, Mobstar (pa download aplicacion riba celular) y Twitter (pronto).
Pa apoya nos representante di Aruba mester download Mobstar, follow ‘Ghislaine Mejia’ y like tur su postnan. Tambe por apoya door di follow ‘Ghislaine Mejia’ via Instagram y ‘Miss World – Aruba’ via Facebook. Tur apoyo via medio social ta conta como punto pa avansa den e competencia.
Na London ya nos representante a saca number pa Head to Head Challenge (entrevista den grupo) y ta forma parti di grupo 17. Keda pendiente pa mas informacion riba tur pagina social di nos representante y via Facebook di Star Promotion: Miss Aruba Pageant. Den potret por mira nos representante na London disfrutando di e momento hunto cu e otro candidatanan, Mr. World y Miss World actual.
Aruba ta keda cordialmente invita pa sigui Miss World Aruba su pasonan y apoya via medio social. Miss World Aruba ta conta cu tur apoyo di Aruba desde awor y durante e competencia na London.
Miss World Aruba ta gradici tur hende cu a contribui na su preparacion y participacion na Miss World.
