Miss World Aruba 2018 ta biaha pa Barbados pa atende Miss World Reunion 2019

Den siman benidero Miss World Aruba 2018 esta Nurianne Arias lo biaha pa e isla di Barbados. E meta di e biahe aki ta pa atende un reunion cu otro candidata cu tambe a participa na e eleccion di Miss World 2018 na December.

Nurianne lo participa den diferente actividad social y turistico. E actividadnan aki ta inclui; un fiesta di gala cu proposito caricativo, un presentacion formal tocante proyecto di ‘Beyesa cu Proposito’ na oficina di Nacionnan Uni di Barbados, bishita na un hospital di mucha, tour rond di e isla y participacion den carnaval di Barbados.

E reinado di Nurianne como Miss World Aruba ta culminando y como tal ta preparando su ultimo actividad social.
Como Miss World Aruba 2018, Nurianne ta desea tur candidata di Miss Aruba 2019 tur clase di exito cu e ultimo preparacionnan prome cu entrega su titulo dia 10 di Augustus 2019.

Despues Nurianne lo sigui organisa evento y actividad na bienestar di e comunidad di Aruba bou di su propio fundacion Speak Your Heart Foundation y como representante di Aruba den e programa internacional Young Leader in Diabetes (di International Diabetes Federation).

Comments

comments