Misha Raymond (Raiz) ta lamenta cu AVP no a bay Casacion of paga prome

Mientras cu tabatin e tratamento di e ley propone pa Gabinete Wever-Croes II pa aproba pago di e suma cu corte a otorga na Lee Stefanelli & Associates Inc. pa falta di cumplimento di contract, lider di fraccion di Plataforma Raiz, Misha Raymond a establece nan posicion cu no kier laga mas tempo pasa pa asina spaar pueblo di paga mas placa.

E parlamentario a resumi e caso bisando cu Stefanelli a bay den Hoger Beroep despues cu gobierno a gana su caso contra dje y el a gana. Den e sentencia, Hues a bisa cu gobierno mester paga un schikking y mester a yega na un acuerdo. “Esey ta e dos articulo cu ta den ley: kico a pasa den Hoger Beroep y kico ta e schikking,” segun Raymond y nada cu Raiz ta bay scapa cabes di Eddie Briesen of cu coalicion ta bay scapa, manera cu a laga sa den prensa.

Durante diahuebs mainta, tabata e propio ex mandatario di AVP, ing. Mike de Meza esun pa admiti cu, den calidad di minister di turismo, el a trek in e vrijwaring cu a kita responsabilidad personal for di Briesen y a dicidi pa no bay apela den Casacion. Algo cu, segun Raymond, ta sorprendente p’e.

“Ta importante pa informacion sali afo pa pueblo pa no manipula. E informacion ta cla, nos tin tur e informacion cu a sali bin dilanti,” segun e parlamentario di Plataforma Raiz, incluyendo e argumento di De Meza di a tuma e decision ey pasobra a considera cu asina a pone fin na un persecucion politico di parti di Otmar Oduber contra Eddie Briesen.

Raymond: “Awe nos ta akinan tanto aña despues, costando pueblo hopi mas placa den e interes, placa di abogado. Esey no ta brinda pueblo e miho servicio como parlamentario of como gobierno.” E lider di fraccion a indica cu ta vota pro na e ley pa asina no keda gasta placa.

“Si e ley aki no pasa, pueblo tin cu keda paga di placa di belasting. Ta lamentabel cu no por a regla esaki tempo cu a perde e caso. Den tur e añanan ey mas gasto a bin paso e no a wordo resolve. Esaki ta e parti culminante,” asina Raymond a culmina, indicando cu e suma miyonario ya ta presupuesta caba den e presupuesto di 2023 cu Parlamento a aproba aña pasa.