Misa di Savaneta a celebra e dia di Pentecost y ta di importancia. E prome dia di importancia ta Pasco di Resureccion, esta Pasco Grandi, despues ta Pasco di Nacemento y di 3 ta Pentecost cu ta culmina e tempo di resureccion. E ta sumamente importante, pasobra e ta marca e inicio di Iglesia ora cu Spirito Santo a baha riba e apostelnan, Maria, riba e prome pueblo.
Vicario Andres Makowiec a bisa cu nan ta considera e Pentecost como cumpleaños di Iglesia. E miembronan di Iglesia ta contento cu ta celebra esaki y solemnidad riba un diadomingo cu ta yama e atencion riba Spirito Santo.
Diadomingo ta pa prepara e siguiente caminda cu Iglesia a pone pa dilanti ta otro misterio Santisima Trinidad, pa medida riba Dios Tata, Dios Yiu y Spirito Santo. Ta den un temporada sumamente importante culminando Pasco di Resureccion. Awo ta e Pentecost despues e dos fiesta grandi cu ta Santisima Trinidad y Corpu Christi.
Ta di dos diadomingo cu Misa di Savaneta a habri su portanan pa publico, pero a cuminsa desde dia 18. E ta bayendo poco poco, unda cu siman pasa tabatin menos hende. No tabatin problema pa tur hende sinta den misa, aunke cu den siman tabatin hopi hende. E puntonan clave pa Misa ta e parti higiena y distancia. Segun Vicario Makowiec, nan a opta pa hendenan drenta solamente via e porta principal y tin hende cu ta atende e parti di higiena, uzando hand sanitizer, mientras cu e portanan lateral ta cera.
Te ora cu Misa cuminsa ta habri otro portanan pa ventilacion. Ta mantene e portanan cera prome cu Misa cuminsa pa asina evita cu hende drenta tur porta, pasobra ta dificil pa haya hende pa tur porta. Tambe e ta dificil pa sinta si tin tur porta habri. E bankinan ta numera, unda cu 1 persona por sinta, of unda famia por sinta hunto sin problema. Den e banki largo por sinta un pareha na un punta y 1 persona na e otro punta. Durante e Misa tabatin un coro y tabata un grupito.
Despues di cada Misa ta desinfecta pa asina hende por participa bek safe y sin problema. No solamente a habri pa actividad den misa, pero a cuminsa cu preparacionnan di bautismo, tin gruponan di muchanan cu lo reuni otro siman diasabra. Ta uzando e normal nobo, pero ta drentando den e custumbernan di antes respentando e parti di higiena y distancia.
