Nos tur por corda na final di luna di mei ora e prome edicion di Island Fest a keda presenta na pueblo di Aruba, e tabata un hit instantaneo.
Awe mirando bek nos por conclui cu Island Fest a bira un exito. Minister Dangui Oduber ta sumamente contento con e prome temporada di Island Festival a bay. Island Festival a wordo crea cu e idea pa trece e turistanan di calidad pa San Nicolas pa asina stimula e economia di San Nicolas.
E aceptacion masal di e evento aki ta demostra cu e vision y maneho cu Gobierno ta hibando pa turismo ta canando den e bon direccion. Esaki mas cu claro cu e ayudo di nos hendenan local cu ta demostra e cordialidad di un forma caluroso na e bishitantenan. Durante tur e eventonan, tur esnan presente por a disfruta di musica, show historico, variedad grandi di cuminda, show di baile y hopi mas. Por a nota hasta personanan cu tabata tin masha hopi tempo sin mira otro, por a para combersa un rato, haciendo e momento uno mas agradabel. “E concepto cu kier a trece dilanti a wordo logra. E ambiente di bario, e cultura Arubiano sin duda a wordo celebra durante e anochinan aki”, Minister Dangui Oduber a expresa cu un sonrisa na su cara.
Pa sostene e maneho di Turismo unda ta trece turistanan di calidad, a crea Island Fest. Aña 2019 tabata e aña piloto di Island Fest caminda e festival a tuma lugar solamente un biaha pa luna na e districto di San Nicolas. Pa otro añ Island Fest lo organisa 2 evento pa luna, 1 lo ta den e districto di San Nicolas y 1 lo varia den e otro districtonan, asina e mandatario a duna di conoce. Finalmente Minister Dangui Oduber kier a gradici henter pueblo di Aruba cu a sa di sostene Island Festival durante e ultimo lunanan y desea Aruba henter feliz dianan di fiesta. Den e luna di December no lo tin Island Fest esaki ta debi na e dianan di fiesta, e proximo fecha di Island Fest lo ta riba diaranson dia 29 di januari 2020.
