E retiro di drs. Franklin Hoevertsz for di Utilities Aruba NV ta algo cu Prome Minister no tabata sa di dje. E prome mandatario ta e Minister politicamente responsabel pa maneho di energia bou unda Utilities Aruba NV ta resorta. Mientras cu abogado mr. Anthony Ruiz a representa Prome Minister Evelyn Wever-Croes den e reunion pa retiro di Frank Hoevertsz, e prome mandatario den combersacion cu 24ora.com a splica cu e no sa nada di e retiro.
A topa cu e prome mandatario diamars atardi na DIMP pasa di 4:00pm. Tur e hendenan yega na Prome Minister tabata sinta den e reunion pa retira e director di Utilities. Richard Eman y Anthony Ruiz ta e hendenan yega na Prome Minister y ta encarga cu e companianan di Utilidad. Pesey ta haya hopi straño cu ainda awe e prome mandatario ta haci comosifuera e no sa di e retiro di e director.
Ta remarcabel cu e mesun contesta aki MinPres Evelyn Wever-Croes a duna tambe den un entrevista dia a kita Robert Henriquez como Director di NV Elmar. E dia ey Prome Minister a bisa tambe cu e no sa tampoco cu a kita e Director for di NV Elmar. Dia cu un carta a lek na WEB tambe riba posibel aumento di prijs di awa y coriente, mescos e prome mandatario cu ta responsabel a bisa cu e no sa di ningun carta y no tin contacto cu e director di WEB. Na dado momento ta trece basta duda riba e expresionnan aki pasobra ta incomprendibel cu un Minister cu ta responsabel pa e companianan di utilidad nunca sa riba e decisionnan unda ta bula cabez di directornan.
Den e dianan nos dilanti lo scucha mas di e situacion pa cu Frank Hoevertsz. Dia di retiro di Robert Henriquez na Elmar, a paga algun 100 mil florin pa kite. Tur cos ta mustra cu den e caso di Frank Hoevertsz no lo ta diferente. E modus operandi aki di kita hende ta costando e gobierno actual hopi placa. Desde cu nan a sinta ta kitando hende cu ta ganando nan caso y gobierno mester paganan.
Pa colmo, esaki ta di tres biaha cu un Gobierno di asignatura di MEP ta kita e mesun Director for di trabou. Den un caso nan mester a pag’e pa e retiro y den e otro caso no pasobra e Gobierno di coalicion a cay, cu consecuencia cu e Gobierno di AVP a reinstala Hoevertsz bek den su funcion na FCCA e tempo ey.
Mester menciona acerca cu ayeranochi ainda tabatin un reunion di e Hunta di Comisarionan di e compania di Utilidad na cas di abogado mr. Hendrik Croes, tata di Minister Presidente. A nota auto di Richard Eman, Presidente di Utilities Aruba NV y Shon No Maduro di NV Elmar, entre otro. Ta bon pa añadi cu Richard Eman tabata den Hunta di Comisario di BBA Bank e tempo aya.
