Diaranson a tuma luga un minisymposium riba diabetes na La Cabana. Esaki a wordo organisa pa duna informacion na pueblo di Aruba, segun Natasha Upegui ta un Praktijk Ondersteuner in opleiding.
Tin profesionalnan manera un dokter di cas, como tambe un Podotherapeut cu ta duna informacion riba pia, tambe enfermeranan specialisa riba diabetes cu a splica riba e complicacionnan di diabetes. Hopi informacion a wordo suministra pa un persona cu tin cu siña biba cu sucu.
Segun Upegui, esaki ta parti di nan proyecto pa caba cu nan estudio cu ta haciendo den specialisacion diabetico. Intencion ta pa sigui organisa simposionan asina pa asina trece e mensahe como tambe informacion afo pa tanto pashent como tambe famia y tur Arubiano cu kier sa mas riba e malesa di sucu.
Pa loke ta e opleiding, Upegui a splica cu nan a cuminsa aña pasa November y lo caba na Juni. E ta consisti di un specialisacion den diabetes y tambe malesanan cardio vascular, manera presion halto, colesterol halto y tambe problemanan di curason.
Esnan cu gradua, ta cay bao di Wit Gele Kruis, pero ta traha na un dokter di cas. Cada dokter di cas tin un POH y por acudi cerca dje pa haya mas informacion pa e cuido cu lo duna cu ta checkeonan general, checkeonan cada tres luna of cada aña. Por haci tareanan chikito, manera manda un pashent specialista pa bay controla bista, manda un pashent na un dietista. Tin cierto cosnan chikito cu por haci, pero semper y cuando ta traha bao di supervision di un dokter di cas.
