Ministro di Finansa, Geoffrey Wever, a tene su prome reunion oficial cu Departamento di Finansa. Meta di e reunion tawata entre otro pa enfoca riba e stapnan necesario pa traha e presupuesto 2026. Despues cu dia 28 di maart Parlamento di Aruba unanimamente a aproba e presupuesto 2025 adapta pa Gabinete AVP- FUTURO pa asina e pensionadonan haya 250 florin extra pa luna desde 1 di mei. Tambe ta baha accijns riba gasolin y diesel desde 1 di mei, e trabaonan ta continua pa ehecuta e vision di e gabinete nobo na bienestar di tur hende.
Durante e reunion cu Departamento di Finansa, ministro Geoffrey Wever a ricibi un bista completo di e trabaonan den ehecucion y tin cu bay ta ehecuta riba e tereno financiero di Pais Aruba. Pa 2025 Departamento di Finansa a elabora riba planificacion di e trabaonan pa 2025.
Departamento di Finansa tin e tarea importante pa den nomber di Ministro di Finansa coordina entre otro e proceso di presupuesto, maneha e administracion central, traha e cuentanan anual y tambe ehecuta e proyectonan di Landspakket.
“Manera palabra den nos Programa di Gobernacion 2025- 2028 e maneho pa finansa publico ta uno duradero y ta un refleho di nos maneho pa drecha entre otro poder di compra, baha costo di bida y duna siguransa na inversionistanan local y internacional di un maneho financiero prudente y transparente”, segun ministro Geoffrey Wever.
Ministro Wever ta gradici Departamento di Finansa pa e bista completo di tur trabao andando y mester ehecuta den 2025 y e apoyo ofreci pa logra e vision- y metanan di Gabinete AVP- FUTURO.
