Tin sospecho cu den e periodo prome cu eleccion insular di dia 20 di Maart na Boneiro, ta papia di bende of cumpramento di voto.
Den un conferencia di prensa, gezaghebber Eison Rijna y hoofdofficier Bote ter Steege, a anuncia di un investigacion haci di por lo menos binti casi caminda cu tin e sospecho cu votonan a wordo bende of cumpra.
“Normalmente Ministerio Publico ta mantene su mes leu di politica,” segun Ter Steege, pero e sospecho di benta of compra di voto a bira asina tangibel cu Ministerio Publico ta sinti su mes yama pa tuma medida.
“Tin entre otro informe di e gezaghebber, di un polis y un lider di un partido politico cu ta kere cu tin indicacionnan concreto di reclutamento di representantenan pa un of mas partido.”
Ter Steeg a señala cu tanto e cumprado como e bendedo a comete un delito. E hoofdofficier no kier a comenta si e sospechonan ta dirigi contra un partido en particular. E uso di apoderadonan (volmacht) bao di man a keda introduci na 2010 den e paisnan di Caribe Hulandes, apesar di e conseho negativo di e partidonan local, riba peticion di e gobierno Hulandes, pasobra e posibilidad aki tambe ta existi na Hulanda.
