Ministerio Publico lo bende algun boto cu tin warda actualmente na Marinierskazerne. E benta lo tuma luga diamars 22 di juni 2021 desde 9:00 am. Lo bende e botonan na esun cu ofrece mas cen.
Mescos cu tempo di benta di boto aña pasa, e personanan cu ta interesa mester inscribi di antemano na Ministerio Publico. Paga tino: e reglanan lo ta mas stricto cu na 2020, relaciona cu e medidanan di Covid-19. Tambe lo tin un maximo di inscripcion di 120 persona.
· Bo tin chens di inscribi pa mas tarda diamars 15 di juni 2021 pa 12’or di merdia na Ministerio Publico via e-mail [email protected]. Bo mag di yama señora Angela na telefon tambe via su number directo 521-4135 riba diahuebs 10 di juni y diabierna 11 di juni 2021 di 2’or pa 4’or di atardi. Corda cu inscripcion ta cera pa 12’or di merdia riba diamars 15 di juni.
· Ora di inscribi mester menciona:
§ Nomber;
§ Fam;
§ Fecha di nacemento;
§ Pais di nacemento;
§ Number di identidad (di bo cedula, paspoort of rijbewijs);
§ Telefon.
· Solamente personanan cu a inscribi cerca señora Angela mag di meld riba 22 di juni 2021 pa 9:00 am na Marinierskazerne pa drenta wak e botonan y saca un bid riba nan. Bo mester tin cerca bo e mes ID cu bo a inscribi cu ne. Si bo no tin e ID aki cu bo, bo lo no wordo admiti. Parkeer mag pafo dilanti kazerne.
· Tapa boca ta obligatorio pa drenta Marinierskazerne. Unicamente persona cu a inscribi, tin entrada. No mag di drenta cu mucha.
· Riba diaranson 23 di juni 2021 lo informa e ganadonan di e bid. Despues por paga na caha di Ministerio Publico na Rumbastraat 29 na Camacuri. Por paga solamente cu cash. Ministerio Publico ta habri di dialuna pa diabierna di 8:00 pa 11:30 am y di 1:00 pa 3:30 pm.
· Lo entrega e botonan despues di mustra recibo di pago, contracto di benta y ID di e cumprado.
· E botonan mester wordo busca mas lihe posibel. E cumprado mes tin cu percura pa transporte. Ministerio Publico no ta duna ningun garantia riba e estado di e botonan. E benta ta “as is where is”.
