Minister Zita Jesus-Leito huntu ku representantenan di Ministerio di Tráfiko, Transporte i Planifikashon Urbano a reuní ku Fundashon Plataforma Bándariba, tokante e problemátika di okupashon i konstrukshon ilegal den área di Bándariba.
E reunion aki ta den kuadro di denunsia nan ku Fundashon Plataforma Bándariba a bin ta hasi pa loke ta trata aktividatnan ilegal ku habitantenan di e área a bin kta hasi pa kumpli ku nan nesesidat di bibienda.
Ta konosí ku pa años i pa diferente motibu Gobièrnu nan di turno no por a kumpli ku e nesesidat aki di nos komunidat pa motibunan di falta di rekurso finansiero i tambe kapasidat di ehekushon. Esaki a kondusí na listanan di espera largu na e.o. Fundashon Kas Popular i tambe Domeinbeheer ku ta e instansia ku ta manehá tereno di Gobièrnu. For di momentu ku Minister Jesus-Leito a asumí e responsabilidat di Minister di Tráfiko, Transporte i Planifikashon Urbano, e tin komo prioridat pa trese klaridat pa loke ta trata listanan di espera na e diferente instansianan aki i tambe kumpli te kaminda por ku nesesidat di komunidat.
Mester enfatisá ku okupashon i konstrukshon ilegal ta kontra tur regla i leinan di nos pais. Na momentu ku komunidat mes sigui ku okupashon ilegal di tereno, esaki ta debilitá Gobièrnu su trabou pa loke ta trata parselashon i otorgashon di tereno.
Durante e reunion ku Fundashon Plataforma Bándariba, a diskutí tokante e puntonan di prekupashon di e fundashon i tambe loke habitantenan di e área a trese últimamente dilanti. E reunion aki a terminá den e palabrashon ku Fundashon Plataforma Bándariba i Ministerio di Tráfiko, Transporte i Planifikashon Urbano, lo pone hende disponibel pa pasa dor di e kehonan ku a keda trese dilanti i hasi análisis di e posibilidatnan pa yega na un solushon pa kada un kaso.
Banda di esaki Ministerio di Tráfiko, Transporte i Planifikashon Urbano ta trahando riba un plan di urgensia integral pa atendé e diferente aspektonan ku ta kai bou di e problemátika di okupashon i konstrukshon ilegal.
Minister Jesus-Leito di su parti ta determiná pa trese klaridat i tambe òrdu den e situashon ku a reina atraves di añanan. Esaki ta un di e diferente pasonan ku Gobièrnu ta tuma pa realisá e meta stipulá.
