Den kuadro di konememorashon di 50 aña kaida di brug Juliana, Ministerio di Enseñansa, Siensia, Kultura i Deporte a lansa un app yamá “Mi Rais”, durante un enkuentro ku komishon di bario Fleur de Marie ku a tuma lugá 6 di novèmber último. E komishon aki, a krea plataforma pa habitantenan bin konta nan historia en konekshon ku kaida di brùg Juliana.
Gobièrnu di Kòrsou su empeño ta pa amplia konosementu di nos historia i trese konsientisashon den nos pueblo. Solamente ku konosementu di nos historia, nos por mira di unda nos a bin i por skohe unda nos ke bai. Un sosiedat bon desaroyá, bon formá, ku étika i empatía pa su ruman, ta forma un komunidat ku ta resplandesé den tur sentido di palabra.
Den kuadro di esaki Ministerio di Enseñansa, Siensia, Kultura i Deporte a laga desaroyá e app “Mi Rais”. Por instalá e app riba telefòn i asina lesa informashon tokante nos historia, kultura i dianan konmemorativo.
“Mi Rais” ta pa grandi i chikí. E app ta un instrumento di Gobièrnu di Kòrsou pa stimulá “life long learning”. Ta importante pa eduká nos mes apesar di nos edat.
Na momento ku bo konosé bo rais, bo ta sinti bo “fundá” i “konektá”.
Pa medio di e brùg, nos a avansá den mobilidat, ekonomia di nos pais i tambe den kontakto ku otro. Esaki ta habri portanan pa traspaso di konosementu. Téknologia ta un di e medionan ku ta konektá nos aun mas lihé na otro. E ta hasi e traspaso di konosementu mas fásil.
E kaida di brùg ta un momento importante den nos historia. 15 hende a pèrde nan bida trágikamente hasiendo nan labor pa kontrukshon di un nashon.
Trahamentu di brùg, a kosta bida di hende, pero tambe ta símbulo di kurashi di nos rumannan ku a sigui ku e labornan pa yega na final. E parti di e historia aki, ta forma parti fuerte di nos rais. Pa e motibu ei, kaida di brùg Juliana ta e promé tema riba “Mi Rais”.
Esaki ta promé biaha ku ta traha un app edukashonal riba un parti di historia di Kòrsou.
Intenshon di Ministerio di Enseñansa, Siensia, Kultura i Deporte ta pa uza e “app” pa sigui elaborá riba Historia Kultura i Dianan konmemorativo.
Den kuadro di esaki Ministerio di Enseñansa, Siensia, Kultura i Deporte ta:
1. duna sostén na grandi i chikí riba konosementu di nos historia;
2. duna informashon pa huntu nos balorá nos mes i sigui huntu konstruí nos nashon;
3. duna rèspèt i honor na esnan ku a bai nos dilanti den e proseso pa konstruí un mihó Kòrsou;
4. fungi kontinuamente komo e brùg di traspaso di nos historia i nos balornan na nos futuro generashon.
Tambe pa animá henter pueblo pa apresiá nos mes esfuersonan i pa keda duna di nos parti pa sigui yuda konstruí nos komunidat i habri portanan pa nos futuro generashon!
Un gradisimentu speshal ta bai na un i tur ku a brinda nan aporte pa desaroyo di “Mi Rais”:
Biblioteka Nashonal Frank Martinus Arion
Ministerio di Tráfiko, Transporte i Planifikashon Urbano
Nationaal Antropologische en Archeologische Museum
Nationaal Archief
Minubia
Sr. Karel Josefa
Sra. Lisette Jansen
Ban hasi uzo di e app pa yuda desaroyá e máksimo potensial di nos mes i di nos pais. Download e app “Mi Rais”. Aktualmente disponibel pa Android i próksimamente pa Apple.
