Ministerio di Enseñansa, Siensia, Kultura & Deporte ta kuminsá ku e promé pasonan pa yega na Diálogo Nashonal den Enseñansa

Ministerio di Enseñansa, Siensia, Kultura & Deporte (E.S.K.D.) ta informá ku resiéntemente a tene un seshon ku personal kaminda ta splika e intenshon pa yega na e Diálogo Nashonal den Enseñansa.

Den kuadro di palabrashonnan ku tin ku partnernan den Edukashon, Ministerio ta kuminsá ku e Diálogo Nashonal den luna di Òktober 2017. Durante di e diálogonan ta bai tin mester di fasilitadó i miembro di sekretariado pa guia e proseso di diálogo. Pesei Ministerio di E.S.K.D. a tene un seshon informativo i a splika tur presente di e Metodologia di un entrenamentu ku United Nations Development Programa (UNDP) lo bai fasilitá. Ta trata di e asina yamá Diálogo Demokrátiko.

E organisashon UNDP ta bai guia e trayekto aki huntu ku Ministerio di E.S.K.D. Durante di e seshon a presentá e Metodologia na e personal. Tur miembro di personal ta haña oportunidat pa partisipá na e entrenamentu pa bira un fasilitadó òf miembro di sekretariado.

Minister sra. M. Alcalá-Wallé tambe a partisipá aktivamente den e seshon aki i indiká ku e ta kere den e struktura di diálogo kaminda ta inkluí tur hende. Tambe ela trese dilanti ku inklushon ta un di e pilarnan fundamental den e programa di gobernashon ku ta kontribuí pa yega na e plataforma pa duna tur hende un oportunidat hustu pa trese nan puntonan dilanti.

Ku esaki Ministerio ta dal e promé pasonan pa ban kapasitá e personal pa bira e fasilitadó i miembro di sekretariado konforme e sistema di UNDP pa asina por yuda realisá Diálogo Nashonal di Enseñansa na un manera demokrátiko.

Comments

comments