Minister Zita Jesus-Leito ta sera Siman di Tráfiko Sigur ku apertura di Piscaderaweg

Pa duna un bon ehèmpel di e medidanan ku Obra Públiko ta tuma pa hasi tráfiko mas sigur, Minister Zita Jesus-Leito ta hasi apertura di Piscaderaweg riba djabièrnè dia 25 di ougùstùs. E akto aki tambe ta fungi komo seremonia ofisial pa sera e Siman di Tráfiko. Ministerio di Tráfiko, Transporte i Planifikashon Urbano (VVRP) a duna atenshon na e tópiko di tráfiko sigur durante di henter e siman ku a pasa pa medio di e konferensia, splikashon na radio i televishon i un konferensia di prensa. Ku apertura di Piscaderaweg na un manera ofisial, ke mustra den realidat kon Obra Públiko ta tene kuenta ku bida di hende den nan manera di diseñá i traha kaminda.

Piscaderaweg pa hopi aña tabata un kaya bastante peligroso, pa motibu ku tráfiko por a pasa riba un velosidat haltu dor di dje, miéntras e kaya ta krusa dor di e bario di Mundu Nobo. Despues ku habitantenan di e bario mes a hasi petishon, Gobièrnu a pone fondonan disponibel pa adaptá e kaya. Ounke e kaya su besindario no ta kompletamente kla, por pone disponibel na tráfiko kaba. Den e simannan ku ta sigui, e kontratista MNO Vervat ta sigui ku e plenchi ku a traha mesora kantu di kaminda i tambe ku plantashon di mata. Eseinan ta hasi e kaminda i su besindario mesora mas bibabel segun normanan di e Agenda Urbano Nobo.

E tópiko di tráfiko sigur ta unu ku Ministerio di VVRP ta duna bastante atenshon na dje, pa motibu ku kada bida pèrdí den tráfiko ta unu di mas. Pa hasi tráfiko mas sigur mester duna entre otro atenshon na e parti di ingenieria, e loke Obra Públiko ta hasi. Otro aspektonan ku ta importante ta e partinan edukashonal, kontrol i emergensia. Durante e konferensia ku a fungi komo apertura di e Siman di Tráfiko Sigur, diferente profeshonal i interesadonan a sera kabes huntu, pa asina hasi e siguiente pasonan pa hasi nos tráfiko mas sigur. Riba término kòrtiku e Plataforma pa Tráfiko Sigur ta kuminsá funshoná pa yega na solushonnan pa nos tráfiko. Obra Públiko ta urgi tur hende pa tene kuenta ku e kambionan na Piscaderaweg, kaminda e medidanan to pone ku tráfiko no por pasa duru mas den e bario. Bida di hende bal hopi mas ku esun minüt ku bo ta skapa dor di kore duru.