Minister Xiomara Maduro na mesa cu Milly Schwengle

1051

E siman aki Minister di Finansa, Asuntonan Economico y Cultura, mr. Xiomara Maduro a ricibi bishita di mr. Milly Schwengle, miembro pa Aruba den Raad van State na Hulanda. Durante e reunion Minister Maduro a duna un bista di e trabounan y e retonan mas recien cu ta toca e carteranan di finanzas, economia y cultura.

Tabata un reunion masha ameno y na final Minister Maduro a presenta na Milly Schwengle un copia di e buki BaluArte pa asina como representante di Aruba por hiba nos cultura semper den mente y curason.

Mildred G.M. Schwengle a bandona su practica priva di abogacia na fin di aña 2017, despues di a inicia na aña 1994. Despues di 23 aña el a dicidi di bay Hulanda pa por sirbi como miembro di e division di conseho di Raad van State di Reino Hulandes. Nan ta conseha Parlamento di Hulanda y gobierno di Reino Hulandes riba maneho y leynan. Nan ta opera independientemente di gobierno. Prome cu bay Hulanda e tabata miembro di e Hunta di Supervision di AIB-Bank N.V. y Raad van Advies di Aruba. E tabata decano tambe di e Orden di Abogadonan di Aruba.